މެއި 6 ގެ ހަމަލާ: މިހާރު ރަނގަޅު ނުވަނީ ފަޔަށް ލިބިވަޑައިގެންނެވި އަނިޔާ އެކަނި
މިދިޔަ މެއިމަހުގެ 6 ވަނަ ދުވަހު ރައީސް ނަޝީދަށް އަމާޒުކޮށްގެ ދިން ނުރައްކާތެރި ޓެރަރިސްޓް ހަމަލާއިން ލިބިވަޑައިގެންނެވި އަނިޔާތަކުގެ ތެރެއިން މިހާރު ރަނގަޅު ނުވަނީ ފަޔަށް ލިބިވަޑައިގެންނެވި ދެ އަނިޔާއެއްކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ބައިނަލްއަގުވާމީ މީޑިޔާ ސީއެންއެންގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ އެ ހަމަލާއިން ސަލާމަތްވީތީ ﷲއަށް ޝުކުރުކުރާ ކަމަށާއި މިހާރު ރަނގަޅު ނުވަނީ ފަޔަށް ލިބުނު ދެ އަނިޔާއެއް ކަމަށެވެ.
"ހަމަލާއިން ސަލާމަތްވީތީ ހެއްދެވި ފަރާތަށް ޝުކުރުކުރަން. ހާލު މިވަގުތު ރަނގަޅު އަދި އަންނަނީ ރަނގަޅުވަމުން. އެތެރެ ހަށީގެ ގިނަ ގުނަވަންތަކެއް މިހާރު ރަނގަޅު. އެކަމަކު އަދިވެސް ފައިގެ ދެ އަނިޔާ އަދި ރަނގަޅެއް ނުވޭ" ރައީސް ނަޝީދު ވިދާޅުވިއެވެ.
މެއި 6ގެ ހަމަލާގެ ސަބަބުން ރައީސް ނަޝީދަށް ލިބިވަޑައިގެންނެވި ޒަހަމްތަކަށް އެންމެ ފުރަތަމަ ފަރުވާ ހޯއްދެވީ އޭޑީކޭ ހޮސްޕިޓަލުންނެވެ. އަދި އެ ހޮސްޕިޓަލުގެ ފަރުވާ ފުރިހަމަކަމުން ޖަރުމަނު ޑޮކްޓަރުން ވެސް ވަނީ ހައިރާންވެފައިކަމަށް ރައީސް ނަޝީދު ވަނީ މީގެ ކުރިން ވިދާޅުވެފައެވެ.
މިގޮތުން މަޖިލީހުގެ އިދާރާއިން ކުރިޔަށް ގެންދިޔަ އާސްކް ސްޕީކާ ޕްރޮގްރާމްގައި ވާހަކަފުޅު ދައްކަވަމުން ރައީސް ނަޝީދު ވަނީ އެމަނިކުފާނަށް ފަރުވާ ދެއްވުމަށް އޭޑީކޭގައި ހަރަކާތްތެރިވި ހުރިހާ ޑަކްޓަރުންނަށާއި ނަރުހުންގެ އިތުރުން ހޮސްޕިޓަލުގެ ސްޓާފުންނަށް ޝުކުރު އަދާ ކުރައްވައިފައެވެ. ﷲގެ އިރާދަފުޅާ އެކު މިއަދު ދުނިޔޭގައި ހުންނެވީ، އޭޑީކޭ ޑަކްޓަރުން ކުރި ބުރަ މަސައްކަތުން ކަމަށް ވެސް ރައީސް ނަޝީދު ވަނީ އެ ޕްރޮގްރާމްގައި ވިދާޅުވެފައެވެ.
ސިކުނޑި ޗެކްކުރިބާ؟ ހިއެއްނުވޭ ސިކުނޑި ރަނގަޅުހެނެއް