ހިޔާ ފުލެޓްގެ މެއިންޓެނެންސް ފީގެ ބާކީ އަނބުރާ ދޭނެ: އެޗްޑީސީ
ހިޔާ ފުލެޓްގެ މެއިންޓެނެންސް ފީގެ ގޮތުގައި ނަގާ ފައިސާއިން ބާކީވާ ފައިސާ އަނބުރާ ރައްދު ކޮށްދޭނެކަމަށް ހައުސިން ޑިވެލޮޕްމަންޓް ކޯޕަރޭޝަނުގެ މެނޭޖިން ޑިރެކްޓަރު އަހްމަދު ސުހައިލް ވިދާޅުވެއްޖެއެވެ.
އެޗްޑީން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ސުހައިލް ވިދާޅުވީ ހިޔާ ފުލެޓުތަކުގެ މެއިންޓެނެސްގެ މަސައްކަތް އެޗްޑީސީން ދާއިމީ ގޮތެއްގައި ނުކުރާނެ ކަމަށާއި އެޗްޑީސީން އެކަން ކުރާނީ އަހަރެއްހާ ދުވަސް ވަންދެން ކަމަށެވެ. އެހެންކަމުން މެއިންޓެނެންސް ފީގެ ގޮތުގައި ފުލެޓުތަކުގެ ވެރިން ދައްކަވާ ފައިސާއިން ބާކީވާ ފައިސާ އަނބުރާ ރައްދުކޮށް ދެއްވާނެ ކަމަށާއި މެއިންޓެނެންސްގެ މަސައްކަތް އެޗްޑީސީން އަހަރެއްހާ ދުވަހު ކުރުމަށް ފަހު ދެން ދޫކޮށްލާނީ ފްލެޓްވެެރިންގެ ޔޫނިއަންތަކަށް ކަމަށް ވެސް ސުހައިލް ވިދާޅުވިއެވެ.
ހިޔާ ފްލެޓަކަށް މަހަކު ދައްކަން ސަރުކާރުން ކަނޑައަޅައިފައި ވަނީ 7،500ރ.ގެ ކުއްޔާއި މެއިންޓެނެންސް ފީގެ ގޮތުގައި މަހަކު 1،000ރ.އެވެ. އެހެންކަމުން ފްލެޓްތަކުގެ ކުލި ކުޑަކޮށްދޭން ގޮވައިލައި އެ ފްލެޓްތަކުގެ ކައިރީގައި އިއްޔެ ވަނީ ހަވީރު މުޒާހަރާކޮށްފައެވެ. ހިޔާ ފްލެޓް ލިބުނު މީހުން ހިންގާ "ހިޔާ ޔޫނިއަން"އިން އިންތިޒާމްކޮށްގެން ބޭއްވި މުޒާހަރާ ކުރިއަށް ގެންދިޔައީ ވަރަށް ހިމޭންކޮށް، ސުލްހަވެރިކަމާ އެކުގައެވެ. ފްލެޓް ލިބުނު މީހުން ސަރުކާރަށް ކުރާ ޑިމާންޑްތައް އިއްވަން ބޭނުންކުރީ ލިޔެފައިވާ ބޯޑުތަކެކެވެ. ބޯޑުތައް ހިފައިގެން އެ މީހުން މަގުމަތީ ތިބީއެވެ.
އެހެން ނަމަވެސް މިހާރު ހަމަޖައްސާފައިވާ ވަރަށް ވުރެ އެފުލެޓްތަކުގެ ކުލި ކުޑަ ނުކުރެވޭނެކަމަށް އެޗްޑީސީން ވަނީ ވިދާޅުވެފައެވެ.
