މިވަގުތު ރާއްޖެއަށް ދާން ޖެހިލުންވޭ: ރައީސް ނަޝީދު 

ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށްގެން ދިން ނުރައްކާތެރި ޓެރަރިސްޓް ހަމަލާގެ ތަހްގީގު އަދި ނުނިމި ކުރިއަށް ދާއިރު، ތަޙްޤީޤު ނިމި، އެކަން ރާވައި ހިންގި ފަރާތްތައް އިންސާފުގެ ކުރިމައްޗަށް ގެނެވި، ހައްޔަރުގައި ބޭތިއްބުމުގެ ކުރީގައި އެނބުރި ރާއްޖެއަށް އައުމަށް ޖެހިލުންވާކަމަށް އެ މަނިކުފާނު ވިދާޅުވެއްޖެއެވެ.

Ads by Sosun Fihaara

ރައްޔިތުންގެ މަޖިލީހުގެ ނައިބު ރައީސާ އީވާ އަބްދުﷲއަށް އެޑްރެސް ކުރައްވައި ރައްޔިތުންގެ މަޖިލީހަށް ރައީސް ނަޝީދު ފޮނުއްވި ސިޓީއެއްގައި ވިދާޅުވީ މިވަގުތު ރާއްޖެއަށް އައުމަށް އާއިލާއާއި، ހެޔޮއެދޭ އެތައް ބަޔަކު ވެސް އަދި އެމަނިކުފާނު ވެސް ޖެހިލުންވާ ކަމަށެވެ.

"6 މޭ 2021 ވަނަ ދުވަހު އަޅުގަނޑަށް ދިން ޙަމަލާ ރާވައި ހިންގި ފަރާތްތަކުގެ ތަޙްޤީޤު އަދި ނުނިމި ކުރިއަށްދާކަމަށް ދިވެހި ފުލުހުންގެ ޚިދުމަތުން ބުނެއެވެ. އެ ތަޙްޤީޤު ނިމި، އެކަން ރާވައި ހިންގި ފަރާތްތައް އިންސާފުގެ ކުރިމައްޗަށް ގެނެވި، ހައްޔަރުގައި ބޭތިއްބުމުގެ ކުރީގައި އަޅުގަނޑު ރާއްޖެ ދިޔުމަކީ އަޅުގަނޑުގެ އާއިލާއާއި އަޅުގަނޑަށް ހެޔޮއެދޭ އެތައް ބަޔަކާއި އަޅުގަނޑު ވެސް ޖެހިލުންވާ ކަމެކެވެ." ރައީސް ނަޝީދުގެ ސިޓީގައި ވިދާޅުވެފައިވެއެވެ.

މި ސިޓީގައި ވިދާޅުވީ ސިޓީއަކީ ސަރުކާރާއި ދައުލަތުގެ އިދާރާއަކާ ނުރުހިގެން އެމަނިކުފާނު ފޮނުވާ ސިޓީއެއް ނޫން ކަމަށާއި އެއީ މިވަގުތުގެ ޙާލަތަށް ރިޢާޔަތްކޮށް، އިޚްލާޞްތެރިކަމާ އެކު ދަންނަވާ ދެންނެވުމެއް ކަމަށެވެ. އަދި ހަމައެހެންމެ އެމަނިކުފާނުގެ ޗުއްޓީގެ މުއްދަތު އިތުރުކޮށްދެއްވުމަށް ވެސް ވަނީ އެދިވަޑައިގަންނަވައިފައެވެ.

މަޖިލީހުގެ އިދާރާއަށް ރައީސް ނަޝީދު ފޮނުވި ސިޓީގައި އިތުރަށް ވިދާޅުވީ އެމަނިކުފާނު ރާއްޖެއިން ބޭރުގައި ހުންނެވި ނަމަވެސް ރައްޔިތުންގެ މަޖިލީހަށާއި ދިވެހި ދައުލަތަށް ޚިދުމަތްކުރުމުގައި މަސައްކަތް ކުރިއަށް ގެންދާނެ ކަމަށެވެ. މީގެ އިތުރުން އެމަނިކުފާނު ރާއްޖެއިން ބޭރުގައި ހުންނަވާއިރު މަޖިލީހުގެ އެންމެހައިކަންކަން ޤާނޫނު އަސާސީއާއި މަޖިލީހުގެ ގަވާއިދުގައިވާ ގޮތުގެމަތިން މަޖިލީހުގެ ޢިއްޒަތްތެރި މެންބަރުންގެ އިރުޝާދުގެ ދަށުން މަޖިލީހުގެ ނައިބު ރައީސް އިސްވެ ހުންނަވައި މަޖިލީހުގެ އިދާރާއިން ހިންގާނެކަމީ އެ މަނިކުފާނުގެ ހިތްޕުޅުގައި އެއްވެސް ޝައްކެއް އުފެދޭކަމެއް ނޫންް ކަމަށް ވެސް ރައީސް ނަޝީދުގެ ސިޓީގައި ވަނީ  ވިދާޅުވެފައެވެ.