ކޮވިޑް-19އިން ރައްކާތެރިވާން ރާއްޖޭގައި އަޅައިފައިވާ ފިޔަވަޅުތައް ހަރުދަނާ ކުރަން ޖެހޭ: މައުމޫން
ކޮވިޑް-19އިން ރައްކާތެރިވުމަށް ރާއްޖޭގައި އަޅައިފައިވާ ފިޔަވަޅުތައް އިތުރަށް ހަރުދަނާ ކުރަން ޖެހޭކަމަށް ކުރީގެ ރައީސް މައުމޫން އަބްދުލް ގައްޔޫމް ވިދާޅުވެއްޖެއެވެ.
ރައީސް މައުމޫން މިހެން ވިދާޅުވީ އަވައްޓެރި ސްރީލަންކާ ލޮކްޑައުން ކުރުމާ ގުޅިގެން ކުރެއްވި ޓްވީޓެއްގައެވެ.
"ކޯވިޑްފެތުރުން ކޮންޓްރޯލް ކުރުމަށްޓަކައި ޝްރީލަންކާގައި ރޭއްސުރެ ފެށިގެން މިމަހުގެ 30 ވަނަދުވަހުގެ ނިޔަލަށް ލޮކްޑައުން އިޢުލާންކޮށްފި. ރާއްޖޭގައި އަޅައިފައިވާ ފިޔަވަޅުތައް ވެސް އިތުރަށް ހަރުދަނާކުރަން ޖެހޭ" ހެލްތު ޕްރޮޓެކްޝަން އެޖެންސީ ޓެގު ކުރައްވާ ރައީސް މައުމޫން ކުރެއްވި ޓްވީޓްގައި ވިދާޅުވެފައިވެއެވެ.
ސްރީލަންކާގައި ކޮވިޑް-19 ހަލުވިކަމާ އެކު ފެތުރެމުން ދާ މިދަނޑިވަޅުގައި އެ ގައުމު ފުރަބަންދު ކުރުމަށް ނިންމައިފައި ވަނީ 10 ދުވަހު މުއްދަތަކަށެވެ.
ކޮވިޑް-19ގެ ސަބަބުން ދަތި ދުވަސްތަކަށް ފަހު ރާއްޖެ "ނިއު ނޯމަލް"އަކަށް އައިސްފައިވާކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހް ވަނީ މީގެ ކުރިން އިއުލާނު ކުރައްވައިފައެވެ. އަދި ކޮވިޑް-19އިން ރައްކާތެރިވުމަށް ރާއްޖޭގައި އަޅައިފައިވާ ހުރިހާ ފިޔަވަޅުތަކަކަށް ވަނީ ލުއި ދީފައެވެ. އެހެންނަމަވެސް ކޮވިޑް-19ގެ ވޭދަނަތައް ފެނި މޮނިޓަރިންއަށް ލާ ރަށްތައް މިހާރު އަންނަނީ ދުވަހެއް ދުވަހަކަށް ގިނަވަމުންނެވެ. މިގޮތުން އެޗްޕީއޭގެ އެންމެ ފަހުގެ ތަފާސް ހިސާބުތައް ދައްކާގޮތުން މިވަގުތު މޮނިޓަރިންއަށް ވަނީ 18 ރަށެއް ލައިފައެވެ.
