ބަރުލަމާނީ ނިޒާމު ގެންނަން ގޮވައިލާ ޕެޓިޝަނެއްގައި ސޮއި ކުރަނީ
ރާއްޖޭގެ ގާނޫނުއަސާސީއަށް އިސްލާހު ގެނެސް، ބަރުލަމާނީ ނިޒާމު ގެންނަން ރައީސް އިބްރާހިމް މުހައްމަދު ޞާލިޙަށް ގޮވައިލާ ވެރިކަން ކުރާ އެމްޑީޕީގެ ތެރޭގައި ޕެޓިޝަނެއްގައި މިއަދު ސޮއިކުރަން ފަށައިފިއެވެ.
އެމްޑީޕީގެ އާންމު މެމްްބަރުންތަކެއް އިސްވެ މިއަދު ތޫމް ރެސްޓޯރަންޓުގައި ބޭއްވި ކުޑަ ރަސްމިއްޔާތެއްގައި، ބަރުލަމާނީ ނިޒާމު ގެންނަން ރައީސަށް ގޮވައިލާ ޕެޓިޝަނެއްގައި ވަނީ ސޮއިކުރަން ފަށައިފައެވެ.
އެ ރަސްމިއްޔާތުގައި ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) އާއި ހެންވޭރު އުތުރު ދާއިރާގެ މެމްބަރު އިބްރާހިމް މުއިއްޒު ބައިވެރިވެ ޕެޓިޝަނުގައި ސޮއިކުރެއްވިއެވެ.
އިންތިޒާމު ކުރި ފަރާތްތަކުން ބުނި ގޮތުގައި މި ޕެޓިޝަންގެ މަސައްކަތް ފެށުނީ އެމްޑީޕީގެ މެމްބަރުންތަކެއް އަމިއްލައަށް ކްލަބް ހައުސްގައި އެކަމާ ބެހޭގޮތުން ވާހަކަ ދައްކައިގެންނެވެ.
ރަސްމިއްޔާތުގައި ވާހަކަ ދައްކަވަމުން މެމްބަރު ބޮންޑޭ ވިދާޅުވީ، ހަގީގީ ލާމަރުކަޒީ ނިޒާމަކުން ގައުމު ހިންގޭނީ ބަރުލަމާނީ ނިޒާމަކަށް ބަދަލުކޮށްގެން ކަމަށާއި ރައްޔިތުން ރައީސުލްޖުމްހޫރިއްޔާ އިންތިހާބު ކުރުމުން، ރައީސް ބަޔަކު ހޮވައިގެން ކެބިނެޓެއް އެކުލަވައިލުމަކީ "އޮލިގާކީ"ގެ ސިފައެއް ކަމަށެވެ.
