އިނގިރޭސި ބަހުން "އިސްލާމް" ކިޔަވައިދީ، ބޭރު ޓީޗަރުން ގެނައުމުގެ ވިސްނުމެއް ނެތް: އެޑިއުކޭޝަން
"އިސްލާމް" މާއްދާ އިނގިރޭސި ބަހުން ކިޔަވައި ދިނުމަށާއި އެ މާއްދާ ކިޔަވައިދޭން ބޭރު ޤައުމުތަކުން ޓީޗަރުން ގެނައުމުގެ ވިސްނުމެއް ނެތް ކަމަަށް އެޑިއުކޭޝަން މިނިސްޓްރީން މިއަދު ބުނެފިއެވެ.
ކުރީގެ ރައީސް އަދި މިހާރު ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން އަމާޒުކޮށް ދިން ހަމަލާ ތަހުގީގު ކުރުމަށް މަޖިލީހުން އުފެއްދި "މެއި 6" ކޮމިޓީން ވަނީ ސްކޫލުތަކުގައި ހަރުކަށި ފިކުރު ފެތުރުން ހުއްޓުވުމަށް 241 ކޮމިޓީގެ ރިކޮމެންޑޭޝަންތައް ތަންފީޒުކުރަން ކުރާ މަސައްކަތްތަކާ ގުޅޭގޮތުން އެޑިއުކޭޝަން މިނިސްޓަރު ޑރ. އައިޝަތު އަލީ އަދި އެ މިނިސްޓްރީގެ އިސްވެރިންނާއެކު މަޝްވަރާތަކެއް ކޮށްފައެވެ.
ވެރިކަން ކުރާ އެމްޑީޕީގެ ގައުމީ މަޖިލީހުން ރޭ ބޭއްވި ޖަލްސާގައި ވިލުފުށީ ދާއިރާގެ މެމްބަރު ހަސަން އަފީފު ވިދާޅުވީ އެޑިއުކޭޝަން މިނިސްޓްރީއާ އެކު ބޭއްވި ބައްދަލުވުމުގައި ސްކޫލު ކުދިންނަށް އަމާޒުކޮށް ހަރުކަށި ފިކުރު ފަތުރައި އަދި ޅަކުދިންގެ ސިކުނޑި އަނބުރާލަން މަސައްކަތް ކުރަމުންދާ ކަމަށް އެކި ފަރާތްތަކުން ވާހަކަދައްކާ ކަމަށެވެ. އަދި އެއީ އެ މިނިސްޓްރީއަށް ވެސް ފާހަގަކުރެވިފައިވާ ކަންތައްތަކަށް ކަމަށް މެންބަރު އަފީފް ވިދާޅުވިއެވެ.
މީގެ އިތުރުން އަފީފު ވިދާޅުވީ، އިސްލާމް ފޮތްތަކުގައި ނަފްރަތު އުފެއްދުމަށް މަގުފަހިވާ ލިޔެކިޔުންތައް ހުރުމުން އެ ބައިތައް ބަދަލުކުރަމުންދާ ކަމަށާއި ރާއްޖެއިން ބޭރުން އިސްލާމް ޓީޗަރުން ގެނެސްގެން ކިޔަވައިދިނުމަށް ކޮންމެ ވެސް ވަރަކަށް ވިސްނަމުން ދާ ކަމަށް މިނިސްޓްރީން ބުނެފައިވާ ކަމަށެވެ.
އަފީފްގެ މި ވާހަކަތަކާ ގުޅިގެން ވަރަށް ބޮޑަށް އާންމުންގެ ކަންބޮޑުވުމާ ނުރުހުން އެޑިއުކޭޝަން މިނިސްޓްރީއަށް މިއަދު އަމާޒުވިއެވެ.
އެހެންކަމުން މިކަމާ ގުޅިގެން އެ މިނިސްޓްރީން މީގެ އިރުކޮޅެއް ކުރިން ނެރުނު ބަޔާނެއްގައި ބުނެފައި ވަނީ އެ މަސައްކަތާ ގުޅޭގޮތުން ބައްދަލުކޮށް، އިނގިރޭސި ބަހުން އިސްލާމް މާއްދާ ކިޔަވައިދިނުމާ ގުޅޭގޮތުން މަޝްވަރާ ކުރެވުނު ކަމަށެވެ. ނަމަވެސް އެ މާއްދާ ކިޔަވައިދިނުމަށް ބޭރު ގައުމުތަކުން ޓީޗަރުން ގެނައުމުގެ ވިސްނުމެއް ނެތް ކަމަށް ބުނެފައި ވެއެވެ.
