ސަލްމާން ސެކިއުރިޓީ ޗެކަށް މަޑުކުރުވުމުން، އޮފިސަރ ކުށްވެރިވެއްޖެ
ސެކިއުރިޓީ ޗެކަށް، އިންޑިޔާގެ މަޝްހޫރު ފިލްމީތަރި ސަލްމާން ޚާން، މަޑުކުރުވުމުން، އޭނާ މަޑުކުރުވި އޮފިސަރާ ދެކޮޅަށް ފިޔަވަޅު އަޅައިފިއެވެ.
ރިޕޯޓްތައް ބުނާގޮތުގައި އިންޑިޔާގެ ސެންޓްރަލް އިންޑަސްޓްރިއަލް ސެކިއުރިޓީ ފޯސް (ސީއައިއެސްއެފް)ގެ އޮފިސަރެއް ސަލްމާން ޚާން މަޑުކުރުވައިފައި ވަނީ އެޔާ ޕޯޓުގައި ކަނޑައެޅިފައިވާ ސެކިއުރިޓީ ޗެކްއަޕް ހެދުމަށެވެ. އެހެން ނަމަވެސް އެމައްސަލައިގައި ސަލްމާން މަޑުކުރުވި އޮފިސަރުގެ ފޯނު ވަނީ ހިފަހައްޓައި އޭނާއާ މެދު ފިޔަވަޅުއަޅައިފައެވެ.
ސީއައިއެސްއެފްއިން ބުނެފައިވާ ގޮތުގައި އޮފިސަރުގެ ފޯނު ހިފަހައްޓައިފައި ވަނީ އެކަމާ ބެހޭގޮތުން އޭނާ އޮޑިޝާގެ މީޑިޔާއަކަށް މައުލޫމާތު ދީފައިވާތީއެވެ. އަދި އޭނާ މީޑިޔާއަށް މައުލޫމާތު ދީފައި ވަނީ ކަނޑައެޅިފައިވާ އުސޫލުތަކާ ހިލާފަށް ކަމަށް ވެސް ސީއައިއެސްއެފްއިން ބުނެފައިވާކަމަށް ރިޕޯޓްތައް ބުނެއެވެ. އެހެންކަމުން އޭނާ އިތުރަށް އެހެން މީޑިޔާތަކަށް މައުލޫމާތު ދިނުން ހުއްޓުވުމަށް އޭނާގެ ފޯނު ހިފެހެއްޓީކަމަށް ވެސް ސީއައިއެސްއެފްއިން ބުނެފައިވެއެވެ.
ސަލްމާން ޚާން އެއާރ ޕޯޓްގެ ސެކިއުރިޓީ ޗެކަށް ހުއްޓުވައިފައި ވަނީ އޭނާގެ ކުރިއަށް އޮތް ފިލްމު ކަމުގައިވާ "ޓައިގަރ 3" ގެ ޝޫޓިންއަށް ރަޝިއާއަށް ފުރަން ގޮސް ހުއްޓާކަމަށް ވެސް ރިޕޯޓްތައް ބުނެއެވެ.
ސަލްމާން ޚާން ސެކިއުރިޓީ ޗެކަން މަޑުކުރުވި އޮފިސަރަށް އާއްމުންގެ ތަރުހީބު ދަނީ ލިބެމުންނެވެ. އަދި އޭނާ އަދާ ކުރީ އޭނާގެ ވަޒީފާކަމަށާއި އެކަމަށް ޓަކައި އޭނާއަށް ޝުކުރު އަދާ ކުރާކަމަށް އާއްމުން ދަނީ ބުނަމުންނެވެ.
