ޖަޕާނުގައި ބޭނުން ކުރި މޮޑާނާ ވެކްސިންގައި ކަޅު ކުލައިގެ އެތިކޮޅުތަކެއް!
ކޮވިޑް-19އިން ދިފާއުވުމަށް ޖަޕާނުގައި ބޭނުން ކުރަމުންދާ މޮޑާނާ ވެކްސިންގެ ތެރެއިން ކަޅު ކުލައިގެ އެތިކޮޅުތަކެއް ފެނިގެން، އެ ބްރޭންޑުގެ ވެކްސިން ބޭނުން ކުރުން ހުއްޓައިލުމަށް އެ ޤައުމުގެ ސަރުކާރުން އަންގައިފިއެވެ.
ކަމާ ބެހޭ ފަރާތްތަކުން ރިޕޯޓުކޮށްފައިވާ ގޮތުގައި، މޮޑާނާ ވެކްސިންގެ ވަޔަލްއެއްގެ ތެރޭގައި ކަޅުކުލައިގެ އެތިކޮޅުތަކެއް އެންމެ ފުރަތަމަ ފެނިފައި ވަނީ އެތަނުގެ ފާމަސިސްޓަކަށެވެ.
މޮޑާނާ ވެކްސިނުން ކަޅު އެތިކޮޅުތަކެއް ފެނިފައިވާއިރު، މިހާރު ވެސް ޖަޕާނުގައި 3،790 މީހުންނަށް ވަނީ އެވައްތަރު ވެކްސިން ދީފައެެވެ.
ރިޕޯޓުތަކުން ބުނެފައިވާ ގޮތުގައި، ކަޅު އެތިކޮޅުތަކެއް ފެނިގެން ބޭނުން ކުރުން ހުއްޓާލާފައިވާ ވެކްސިންގެ އަދަދު 1.63 މިލިއަނަށް އަރައެވެ.
ފާމަސިސްޓަށް އެ ވެކްސިނުން ކަޅު ކުލައިގެ އެތިކޮޅުތަކެއް ފެނުނީ އޭނާ އެ ވެކްސިންތައް ޗެކް ކުރުމުގެ ތެރޭގައި ކަމަށް ވެސް އެ ރިޕޯޓުގައިވެއެވެ.
ޖަޕާނުގެ ސިޓީތަކަށް މޮޑާނާގެ އެ ވެކްސިން ފޮނުވި ފަރާތުން ބުނެފައި ވަނީ ކަޅު ކުލައިގެ އެތިކޮޅުތަކެއް ފެނިފައިވާ ހޮޅި ހުރީ ތަޣައްޔަރު ވެފައިވާކަމަށް ބެލެވޭ ކަމަށެވެ. އެހެންކަމުން ކުންފުނި ބަންދުކޮށް އިތުރު ތަހުލީލުތައް ދަނީ ހަދަމުންނެވެ.
