އެމްޑީޕީގެ ބޭފުޅުންނަށް "އިންސާފު" މިބަސް ކިޔުން މަނާ ވެއްޖެ: ޖަމީލް
މޯލްޑިވްސް ޑިމޮކްރަޓިކް ޕާޓީ، އެމްޑީޕީގެ މެންބަރުންނަށް "އިންސާފު" މިބަސް ކިޔުން މަނާވެއްޖެ ކަމަށް ރައީސް ޔާމީންގެ ފުރަތަމަ ނައިބު ރައީސް އަދި އެމަނިކުފާނުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ ޑރ.މުޙައްމަދު ޖަމީލް ވިދާޅުވެއްޖެއެވެ.
ޑރ.ޖަމީލް މިހެން ވިދާޅުވެފައިވަނީ، މިރޭ އިދިކޮޅު ކޯލިޝަނުން "އައްޑަނަ"ގެ ނަމުގައި ބާއްވާ ޖަލްސާގައި ވާހަކަފުޅު ދައްކަވަމުންނެވެ. ޑރ.ޖަމީލް ވިދާޅުވީ ޔާމީންގެ މައްޗަށް އިއްވި ޖަލު ހުކުމަށް ސަރުކާރުން ނުފޫޒު ފޯރުވާފައިވާ ކަމަށާއި އެހެންވެ، އިންސާފުގެ ވާހަކަ އެމްޑީޕީން ދެން ދައްކައިގެން ނުވާނެ ކަމަށެވެ.
"ދޯންޏެއްގެ މަތީގައި ވެސް، މަގުމަތީގައި ވެސް، ސިއްރުން ވެސް، އެމްޑީޕީގެ ބޭފުޅުން އިންސާފު، މި ލަފުޒު ބޭނުން ނުކުރައްވާތި." ޖަމީލް ވިދާޅުވިއެވެ.
ރާއްޖޭގެ ޖުޑީޝަރީ މިނިވަން ކުރުމަށް ވައުދުވެ އެމްޑީޕީން ވެރިކަމަށް އައުމަށް ފަހު، އެ ވައުދު ނުފުއްދާ ކަމަށް، ބުނެ ޑރ.ޖަމީލް ވަނީ ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. މިގޮތުން ވިދާޅުވީ، ޝަރުއީ ދާއިރާ އިސްލާހް ކުރާނެ ކަމަށް ބުނެ، ޝަރުއީ ދާއިރާ ހިޞޯރުކޮށްފައިވާ ކަމަށެވެ. ޖުޑީޝަރީގެ ކަންކަން އިސްލާހުކޮށް އެކަންކަން ރަނގަޅު ކުރަން އައިމީހުންގެ އަމާޒަކީ އެންމެ މީހެއްގެ މައްޗަށް ޝަރީއަތް ހިންގުން ކަމަށާއި މިއަދުގެ ސަރުކާރުން ޖުޑީޝަލް ސާވިސް ކޮމިޝަންގެ ރައީސް ހިސާން ހުސެއިންގެ ލޯ ފާމަށް ޕްރައިވަޓައިޒްކޮށްފައިވާ ކަމަށް ވެސް ޖަމީލް ވިދާޅުވިއެވެ.
ޖަމީލްގެ ވާހަކަފުޅުގައި ވިދާޅުވީ، ރައީސް ޔާމީނާ ގުޅޭ ގޮތުން މިއަދު އަސްލެއް ނެތް މައްސަލަތައް އުފަންކޮށްގެން އެކަންކަން ބަލަމުންދާ ކަމަށެވެ. އަދި ޕްރޮސެކިއުޓަރ ޖެނެރަލަށް އިޝާރާތް ކުރައްވައި ވިދާޅުވީ، މައްސަލަތަކުގައި ދައުވާ އުފުލަން ހުންނެވި ބޭފުޅާ ވެސް ވަނީ ވެރިކަމުގަައި ހުންނެވި ރައީސް ޞާލިޙްގެ ޖީބުގައި ކަމަށެވެ. މީގެ އިތުރުން މިއަދު ސަރުކާރުން ކަންތައްކޮށްފައިވާ ގޮތުން ޝަރުއީ ނިޒާމް އެއްކޮށް ނަޖިސްވެފައިވާ ކަމަށް ވިދާޅުވިއެވެ.
"ދިވެހި ރާއްޖޭގެ ޝަރުޢީ ގެތަކުން މިއަދު ކުރާ ހުކުމްތަކުން ސީދާ ނިކުމެގެން ދަނީ މާލޭގެ މައި ބޮޑު ޖަންގްޝަން ތެރެއަށް. ސަރުކާރުން ކުރި މަސައްކަތުގެ ނަތީޖާއަކީ ކޯޓުތަކުގެ ޙުކުމްތައް މިއަދު ވަނީ ނަޖިސްވެފައި. ސަރުކާރުގެ މިމައްސަލަތަކުން ދިވެހި ރާއްޖޭގެ ކޯޓުތަކުގައި މިވަނީ ޝަރުއީ ކޯޓުތަކުގެ ނަޖިސް ވަސް ފެތުރިފައި" ޖަމީލް ވިދާޅުވިއެވެ.
ޖަމީލް ވިދާޅުވީ، 2023 ވަނަ އަހަރު ރާއްޖޭގެ ވެރިކަމަށް ޔާމީން ވަޑައިގަންނަވާނެ ކަމަށެވެ. އަދި މިހާރު ސްޕްރީމް ކޯޓުގައި އޮތް މައްސަލައިގައި ނިމޭނީ ރައީސް ޔާމީންގެ ކޮޅަށް ކަމަށާއި އެމަނިކުފާނު މިނިވަންވާނެ ކަމަށް ވެސް ޖަމީލް ވިދާޅުވިއެވެ.
"ސްޕްރީމް ކޯޓުގައި މިއޮތް މައްސަލައިގައި އިރާދަ ކުރެއްވިއްޔާ، އަދުލުވެރި ކަމާއެކުގައި މި ޝަރީއަތް ހިނގާނެ ކަމުގެ ޔަޤީންކަން އަޅުގަނޑަށް އެބައޮތް. ރައީސް ޔާމީންގެ މައްޗަށް އެ ޙުކުމް ދެމެހެއްޓޭނެ އިތުރު އެއްވެސް ގޮތެއް ނެތް." ޖަމީލް ވިދާޅުވީ، ރައްޔިތުން އެދޭ ފަދަ ވެރިކަމެއްކޮށްދޭން ރައީސް ޔާމީން އެނބުރި ވެރިކަމަށް ވަޑައިގަންނަވާނެ ކަމަށެވެ.
