އިސްރާއީލުން ފަލަސްތީނަށް ހެދިގޮތް، އިންޑިއާއިން ރާއްޖެއަށް ހަދާނެ: އަދުރޭ
މަގު ހަދާ މީހުންގެ ނަމުގައްޔާއި ބްރިޖު އަޅާ މީހުންގެ ނަމުގައި ރާއްޖެ އަންނަ މީހުންނަކީ އާދައިގެ މީހުން ނޫން ކަމަށާއި މިއަދު އެމީހުން އައިސް ރާއްޖޭގައި ކުރާ ކަންކަމުގެ ނަތީޖާ ފެންނާނީ އަދި މާފަހުން ކަމަށާއި އެމީހުންނާ މެދު ދިވެހި ރައްޔިތުން ފާރަވެރިވެ، ސަމާލުވުމަށް، އިދިކޮޅު ކޯލިޝަންގެ ވަގުތީ ލީޑަރު އަބްދުއްރަޙީމް އަބްދުﷲ ވިދާޅުވެއްޖެއެވެ.
މި ސަރުކާރުގެ ގިނަ ޕްރޮޖެކްޓްތައް ހިންގަނީ އިންޑިއާގެ ކުންފުނިތަކުންނެވެ. މިގޮތުން "ގްރޭޓާ މާލެ ކަނެކްޓިވިޓީ ޕްރޮޖެކްޓް" ގެ ދަށުން މާލެ، ވިލިމާލެ، ގުޅީފަޅު އަދި ތިލަފުށި ގުޅުވައި އަޅަން ނިންމާފައިވާ ބްރިޖުގެ އެއްބަސްވުމުގައި އިންޑިއާގެ އެފޮކޮންސް އިންފްރަސްޓްރަކްޗާ ކުންފުންޏާ އެކު ސޮއިކޮށްފައިވާއިރު، އައްޑޫ މަގުތައް ހަދަނީ ވެސް އިންޑިއާގެ ކުންފުންޏަކުންނެވެ. އިދިކޮޅު ކޯލިޝަނުން ބޭއްވި “އައްޑަނަ” ޖަލްސާގައި ވާހަކަފުޅު ދައްކަވަމުން އަދުރޭ ވިދާޅުވީ، މިފަރާތްތަކަށް ސަމާލުވުމަށް ގޮވައިލައްވާފައެވެ.
"އަޅުގަނޑުމެންގެ ޤައުމު ސަލާމަތްކޮށްދޭނެ ވެރިންނެއް އަޅުގަނޑުމެންގެ ޤައުމުގައެއް ނެތް. އަޅުގަނޑުމެންގެ ޤައުމު ސަލާމަތްކޮށްދޭނެ މުއައްސަސާތަކެއް މިޤައުމަކު ނެތް. މިކަން ކުރަން ތިބީ ހަަމަ އަޅުގަނޑުމެން ރައްޔިތުން. މިކަން ކުރަން އޮތް ވަގުތަކީ މިއީ. މިވަގުތު އަޅުގަނޑުމެންގެ އަތުން ބީވެގެން ހިގައްޖިއްޔާ، އަޅުގަނޑުމެން ދެން އުޅެން ޖެހޭ ގޮތް، ތިޔަ ބޭފުޅުން ލޯފުޅު ހުޅުއްވައި ލައްވާފައި ތިޔަ ބޭފުޅުންގެ ޚިޔާލީ އަހުގައި ދަތުރު ކުރައްވާ ފަލަސްތީނުގެ ބިމަށް." އަދުރޭ ވިދާޅުވީ، ސަމާލު ނުވެއްޖެނަމަ ފަލަސްތީނުގެ ބިމުގައި ފަަލަސްތީނުގެ އުފަން ރައްޔިތުން މިއަދު އުޅެމުން އެގެންދާ ހާލު، މާދަމާ ދިވެހި ރައްޔިތުން ދިވެހި ބިމުގައި އުޅެން ޖެހިދާނެ ކަމަށެވެ. އަދި އިންޑިއާއިން އަންނަ މީހުންނަކީ، މާދަމާ ދިވެހި ރައްޔިތުންގެ ގޯތި ގެދޮރުން ނެރެ ބޭރު ކުރާނެ މީހުން ކަމަށް ވެސް އަދުރޭ ވިދާޅުވިއެވެ.
އިންޑިއާގެ ސިފައިން ރާއްޖޭގެ އެކި ސަރަަހައްދުތަކުގައި ސްޓޭޝަންވެފައި ތިބޭ ތިބުމަށް އިޝާރާތް ކުރައްވަމުން އަދުރޭގެ ވިދާޅުވީ، އެއްވެސް ޤައުމެއްގެ ސިފައިން ރާއްޖޭގައި ތިބުމަށް ނޭދޭ ކަަމަށެވެ. އަދި އިންޑިއާ އަސްކަރިއްޔާއިން ރާއްޖެއިން ފޭބުމަށް ގޮވަނީ އިންޑިއާ ވެގެން ނޫން ކަމަށާއި އަވަށްޓެރި އިންޑިއާއަކީ ދިވެހިންގެ އެކުވެރި ޤައުމެއް ކަމަށް ވެސް އަދުރޭ ވިދާޅުވިއެވެ. އެހެން ނަމަވެސް، އެ ޤައުމަކީ ރާއްޖެ އަޅުވެތިކޮށް، އަޅުވެތި ޤައުމަކަށް ވެގެން ނުވާނެކަމަށް ވެސް އަދުރޭ ވިދާޅުވިއެވެ.
"އިންޑިޔާއިން ދިވެހިން އަޅުވެތި ކުރަން ނޫޅުއްވާ. އިންޑިއާއި މި ގޮވާލަނީ އަސްކަރީ ސިފައިން ގެންދަވުމަށް. މިހާރުން މިހާރުން އިންޑިޔާގެ ސިފައިން ބާލައި، ގޮތް ނޭނގޭ އެގްރިމަންޓްތައް އުވައިލާން ސަރުކާރަށް ގޮވާލަން." އަދުރޭ ވިދާޅުވިއެވެ.
މިރޭ އިދިކޮޅުން ކާނިވާ ސަރަހައްދުގައި ބޭއްވި ޖަލްސާގައި ގިނަ އަދަދެއްގެ މީހުން ބައިވެރިވެފައިވެއެވެ.
ތެދެއް