ވިޔަފާރި އުސޫލުން މާލޭގައި ހިންގާ ޑްރަގް ކެފޭތައް ބަންދުކުރަން އޮޕަރޭޝަނެއް ފަށައިފި
ވިޔަފާރި އުސޫލުން މާލޭގައި ހިންގާ ޑްރަގް ކެފޭތައް ބަންދުކުރަން ފުލުހުން ހާއްސަ އޮޕަރޭޝަނެއް ފަށައިފިއެވެ.
މިކަމާ ގުޅޭގޮތުން ފުލުހުންގެ މީޑިއާ އޮފިޝަލު ވިދާޅުވީ މިއަދު ހެނދުނު 07:00 އިން ފެށިގެން ޑްރަގް ކެފޭ ކަމަށް ފާހަގަކުރެވޭ ތަންތަނަށް މީހުން ވަނަނުދީ ހިފަހައްޓަމުން އަންނަ ކަމަށެވެ.
ވިޔަފާރި އުސޫލުން ހިންގާ ޑްރަގް ކެފޭތަކުގައި ފުލުހުން 24 ގަޑިއިރު ހަރަކާތްތެރި ވާނެ ކަމަށް ވެސް އޮފިޝަލު ވިދާޅުވެފައިވެއެވެ.
މީގެ އިތުރުން ފުލުހުން ވިދާޅުވީ ކެފޭ އުސޫލުން މަސްތުވާތަކެތި ވިއްކާ 25 ތަނެއްގެ ވެރިފަރާތަށް ގާނޫނީ އިންޒާރުދީފައިވާ ކަމަށެވެ. އަދި އެފަދަ އަށް މައްސަލައެއް ތަހުގީގުކޮށް ދައުވާ ކުރަން ޕީޖީއަށް ފޮނުވާފައިވާ ކަމަށާއި އިތުރު ހަތަރު މައްސަލައެއް ވަރަށް އަވަހަށް ޕީޖީއަށް ފޮނުވާނެ ކަމަށް ވެސް ފުލުހުން ވިދާޅުވިއެވެ.
މަސްތުވާތަކެތީގެ ވިޔަފާރި ކެފޭ އުސޫލުން ހިންގާ މ. ބްރައިޓްފްލާވާ ގޭގެ ވެރިމީހާގެ މައްޗަށް ޕީޖީން ދާދި ފަހުން ވަނީ ދައުވާކޮށްފައެވެ.
