ފެންނަން ނެތަސް، އަހަރުމެންގެ ހިތުގައި ދާއިމަށް ވެސް ސިދާތު ވާނެ: ސިދާތުގެ އާއިލާ
އެކްޓަރު ސިދާތު ޝުކްލާގެ ކުއްލި މަރަކީ ގިނަ ބަޔަކަށް ގަބޫލު ކުރަން ދަތިވި ޚަބަރެކެވެ. ހާއްސަކޮށް އޭނާގެ ލޯބިވެރިޔާ ކަމަށް އަޑުތައް ފެތުރިފައިވާ ޝެހެނާޒްއަށް ލިބިފައިވާ ކުއްލި ސިހުމުގެ ސަބަބުން އޭނާގެ ހާލަތު އަދިވެސް ގޯސް ކަމަށް މީޑިޔާ ރިޕޯޓްތައް ބުނެއެވެ.
ސިދާތުގެ ކުއްލި މަރާއެކު އެންމެ ބޮޑު ޝޮކެއް ލިބުނު އެއްބަޔަކީ އޭނާއެ އާއިލާ ކަމީ ޝައްކެއް ވެސް އޮތް ކަމެއް ނޫނެވެ. އިއްޔެ ހަވީރު ސިދާތުގެ ޖަނާޒާގެ އެންމެފަހުގެ ކަންކަން ކުރިއަށް ގެންގޮސްފައިވާއިރު އޭނާގެ އާއިލާއިން ފުރަތަމަ ފަހަރަށް މި ވަނީ ބަޔާނެއް ނެރެފައެވެ.
އާއިލާއިން ނެރުނު ބަޔާނުގައި ސިދާތުއަށް އޭނާގެ ފޭނުން ދިން ލޯތްބާ ކުރި ދުއާއަށް ވަނީ ޝުކުރު އަދާކޮށްފައެވެ. އަދި އަބަދުވެސް އޭނާ މަތިން ހަނދާން ކުރުމަށާއި އޭނާއަށް ދުއާ ކޮށްދިނުމަށް އޭނާގެ އާއިލާއިން ވަނީ ސިދާތުގެ ފޭނުންގެ ކިބައިން އެދިފައެވެ.އަދި މުމްބާއި ޕޮލިސް ފޯސްއަށް ހާއްސަ ޝުކުރެއް އަދާކޮށްފައިވާއިރު އެމީހުންގެ ފަރާތުން ލިބުނު ރައްކާތެރިކަމަށް ވެސް ސިދާތުގެ އާއިލާއިން ވަނީ ޝުކުރު އަދާކޮށްފައެވެ.
ސިދާތު މަރުވެފައި ވަނީ ހާޓް އެޓޭކެއް ޖެހިގެންނެވެ. އެހެން ނަމަވެސް އޭނާގެ ފޭނުން ތުހުމަތު ކޮށްފައި ވަނީ އޭނާ މަރައިލައިފައިވާ ކަމަށެވެ.
އިއްޔެ ހެނދުނު ސިދާތު ނިދާ ނުހޭލައިގެން އޭނާގެ މަންމަ އެމީހުންގެ އާއިލީ ޑޮކްޓަރު ގެނެސް ބެލުމަށް ފަހު އެއްވެސް ހަރަކާތެއް ނެތުމުން އޭނާ އިންޑިޔާގެ ކޫޕަރ ހޮސްޕިޓަލަަށް ގެންގޮސްފައިވާކަމަށް ރިޕޯޓްތައް ބުނެއެވެ.
ހޮސްޕިޓަލަށް ގެންދިޔަ އިރުވެސް އޭނާ މަރުވެފައިވާކަމަށް އޭނާގެ ހަށިގަނޑު ބެލި ކޫޕަރ ހޮސްޕިޓަލުން ވަނީ ބުނެފައެވެ.
ސިދާތު ވަނީ ކާމިޔާބު އެތައް ޑްރާމާއެއް ބެލުންތެރިންނާ ހަމައަށް ގެނެސްދީފައެވެ. އޭނާގެ މަރުގެ ޚަބަރާ އެކު އިންޑިޔާގެ ފަންނާނުން ވަނީ ބޮޑު ޝޮކެއްގެ ތެރޭގައެވެ. އަދި ފޭނުން ދަނީ އެކަމާ ހިތާމަ ފާޅުކޮށް މުޅި ސޯޝަލް މީޑިޔާ ފުރައިލައިފައެވެ. ފޭނުން ބުނާ ގޮތުގައި މިއީ ގަބޫލުކުރަން ދަތި ޚަބަރެކެވެ
