ޖަލުން ފިލި ފަލަސްތީނުގެ މީހުންގެ އާއިލާތައް އިޒްރާއިލް މީހުންގެ "ޓާގެޓަކަށް"
އިޒްރާއިލްގެ ހައި ސެކިއުރިޓީ ޖަލަކުން ބިން ކޮނެގެން ފިލައިފައިވާ ފަލަސްތީނުގެ ރައްޔިތުންގެ އާއިލާ މީހުން ޖަލަށްލުމުގެ މަސައްކަތް އިޒްރާއީލުގެ ސިފައިން ފަށައިފިއެވެ.
ރިޕޯޓްތައް ބުނާގޮތުގައި ޖަލުން ފިލި މީހުންގެ އާއިލާތަކުން މިއަދު އެކަނި ވެސް ވަނީ މަދުވެގެން 7 މީހުން އިޒްރާއީލް ސިފައިންގެ ބެލުމުގެ ދަށަށް ގެންގޮސްފައެވެ. އިޒްރާއިލް ސިފައިން ވަނީ ޖެނިންގެ ރެފިއުޖީ ކޭމްޕުތަކަށް ގޮސް، ޖަލުން ފިލި މީހުން އެތާނގައި ފިލާ ތިބިކަމަށް ތުހުމަތުކޮށްފައެވެ.
ޖެނިންގެ ރެފިއުޖީ ކޭމްޕުތަކުން ހައްޔަރުކޮށްފައިވާ ފަލަސްތީނުގެ ރައްޔިތުންތަކެއް ޖަލުން ފިލުމުގެ ހަބަރު ލިބުމާ އެކު ރެފިއުޖީ ކޭމްޕަށް އިޒްރާއިލު ސިފައިން ކޮންމެ ވަގުތެއްގައި ވެސް އަތުވެދާނެ ކަމަށް ތައްޔާރަށް ތިބި ކަމަށް އެކޭމްޕްގައި ތިބި ފަލަސްތީނު ރައްޔިތުން ވަނީ ބުނެފައެވެ.
އިޒްރާއިލު ސިފައިން ދަނީ ދޭތެރެ ދޭތެރެއިން ޖެނިންގެ ރެފިއުޖީ ކޭމްޕުތަކަށް ވަދެގަނެ ހަމަނުޖެހުން ހިނގާ މީހުން މަރަމުންނެވެ. މިގޮތުން މިދިޔަ އޮގަސްޓުމަހުގެ ތެރޭގައި ވެސް ފަލަސްތީނުގެ ޖެނިންގެ ރެފިއުޖީ ކޭމްޕްއެއް ކައިރީގައި އިޒްރާއީލުން ސިފައިން ހިންގި ހަމަނުޖެހުންތަކެއްގައި ފަލަސްތީނުގެ 4 މީހެއް ވަނީ ޝަހީދު ކޮށްލައިފައެވެ.
އެފަހަރުގެ ހަމަލާއާ ބެހޭގޮތުން މަންޒަރު ދުށް ފަރާތްތަކުން މީޑިޔާތަކަށް މައުލޫމާތު ދިން ގޮތުގައި އިޒްރާއިލުން ހިންގި ހަމަނުޖެހުންތަކުގެ ތެރޭގައި ޒުވާނުންގެ ގުރޫޕެއްގެ ތެރެއަށް ބަޑި ޖަހައިފައި ވެއެވެ. އަދި ސްޓަން ގްރޭނައިޑްއާއި ކަރުނަ ގޭސް ގިނަ އަދަދަކަށް ޖަހައިފައިވާކަމަށް ވެސް އެ ފަރާތްތަކުން ވަނީ މީޑިޔާގައި ބުނެފައެވެ.
މި ހަމަނުޖެހުންތަކާ ގުޅެގޮތުން އިޒްރާއީލް ބުނެފައި ވަނީ ހަމަލާ ދީފައި ވަނީ އިޒްރާއިލްގެ ސިފައިންނަށް ފަލަސްތީނުގެ ޒުވާނުން ހަމަލާ ދިނުމުން ކަމަށެވެ. އެހެން ނަމަވެސް އިޒްރާއީލުގެ އެއްވެސް އޮފިސަރަކަށް އެއްވެސް ވަރެއްގެ އަނިޔާއެއް ލިބިފައިނުވާކަމަށް ވެސް ރިޕޯޓްތައް ބުނެއެވެ.
ދިވެހިންވެސް ހޭއަރާ، މިޤައުމުވެސް ފަލަސްތީނަކަށް ވާކަށް މާ ގިނަ ދުވަހެއް ނެތް.