ޤައިދީންގެ ފައިސާއާ ބެހޭ މުޢާމަލާތްތައް ފަސޭހައިން ބެލެހެއްޓޭނެ ނިޒާމެއް ތަޢާރަފުކޮށްފި
ޤައިދީންނާއި ބަންދުމީހުންގެ ފައިސާއާ ބެހޭ މުޢާމަލާތްތައް ފަސޭހަކަމާ އެކު ބެލެހެއްޓޭނެ ނިޒާމެއް ތަޢާރަފުކޮށްފިއެވެ.
ކަރެކްޝަނަލް ސަރވިސްއިން ވިދާޅުވީ، "ޕްރިޒަނަރ އެކައުންޓްސް މެނޭޖްމަންޓް ސިސްޓަމް" މެދުވެރިކޮށް ފަސޭހަކަމާ އެކު ވިޔަފާރި އުޞޫލުންކުރާ މުޢާމަލާތްތައް ބެލެހެއްޓޭނެކަމަށެވެ.
ކަރެކްޝަނަލް ސަރވިސްއިން ވިދާޅުވީ އެ ސަރވިސްގެ ބެލުމުގެ ދަށުގައިވާ ޤައިދީންނާއި ބަންދު މީހުންނަށް ޢާއިލާއިން ފައިސާ މިހާރު ފޮނުވޭނީ ހަމައެކަނި ބަނޑޭރިޕޭ މެދުވެރިކޮށް ކަމަށެވެ. އަދި ގައިދީން ޖަލުގައި ވަޒީފާ އަދާކޮށްގެން ލިބޭ އާމްދަނީއާއި އާއިލާއިން ފޮނުވާ ފައިސާ މެނޭޖުކޮށް ބެލެހެއްޓުމަށް “ޕްރިޒަނާސް އެކައުންޓް މެނޭޖްމަންޓް ސިސްޓަމް’ އެހީތެރިވެދޭނެ ކަމަށް ވެސް ކަރެކްޝަނުން ވިދާޅުވިއެވެ.
މި ސިސްޓަމް މެދުވެރިކޮށް ހުރިހާ ޖަލަކާއި ހެޑް އޮފީސް ގުޅުވައިދެއެވެ. މީގެ ސަބަބުން އެއް ޑޭޓާ ބޭސްއަކުން ޤައިދީންގެ ރިކޯޑްތައް ބެލެހެއްޓި، ކަންތައްތައް ކުރުމުގައި ކުރިއަށް ވުރެ އަވަސްވެ، ކަރުދާސް ބޭނުންކުރުމާއި ޑަބަލްކޮށްކުރަން ޖެހޭ މަސައްކަތްތައް ލުއިވެގެންދާނެކަމަށް ކަރެކްޝަނަލް ސަރވިސްއިން ވިދާޅުވެއެވެ.
