ރައީސް ޔާމީނާ މެދު ފިޔަވަޅު އަޅާނެކަމަށް ކަރެކްޝަނުން ބުނެފި
ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމް މިއަދު ޢަމަލުކުރެއްވީ ގޭ ބަންދުކޮށްފައިވާ އިޤްރާރާ ޚިލާފަށް ކަމަށާއި އެހެންކަމުން މައްސަލަ ބަލައި ފިޔަވަޅު އަޅާނެކަމަށް ކަރެކްޝަންސްއިން ބުނެފިއެވެ.
ކޮމިޝަނަރ އޮފް ޕްރިސަންޒް އަހުމަދު މުހައްމަދުފުޅު މިރޭ ކުރެއްވި ޓްވީޓެއްގައި މިހެން ވިދާޅުވީ މި ވަގުތު ގޭ ބަންދުގައި ހުންނަވައިގެން ހުކުމް ތަންފީޒު ކުރައްވަމުން ގެންދަވާ ރައީސް ޔާމީން، އިދިކޮޅުގެ ހަރަކާތުގެ ބައިވެރިންނަށް ފެނިލައި، ޤައުމީ ދިދައާއި ޕީޕީއެމްގެ ދިދަ ވިހުރުވައިލައްވައި އިހުތިޖާޖުގެ ބައިވެރިންނަށް ހިތްވަރު ދެއްވައިފައިވުމުގެ ސަބަބުންނެވެ.
"ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމް މިއަދު ޢަމަލުކުރެއްވީ ގޭ ބަންދުކޮށްފައިވާ އިޤްރާރާ ޚިލާފަށް. އެހެންކަމުން މި މައްސަލަ ބަލާ، ފިޔަވަޅު އަޅާނަން." ކޮމިޝަނަރގެ ޓްވީޓްގައި ވިދާޅުވިއެވެ.
"އިންސާފު ހޯދަން" ނަމުގައި އިދިކޮޅު ކޯލިޝަނުން ފުރަތަމަ ނިންމީ ސުލްޙަވެރި ހިނގާލުމެއް ބޭއްވުމަށެވެ. ނަމަވެސް ކާނިވާ ސަރަޙައްދުން ގިނަ އަދަދެއްގެ އެސްއޯ ފުލުހުން ވަނީ އެ ހިނގާލުމަށް ހުރަސް އަޅައިފައެވެ. އެހެންކަމުން އެ ހިނގައިލުން ފަހުން ވަނީ އެއްވުމަކަށް ބަދަލުކޮށްފައެވެ.
އިހުތިޖާޖުގެ ބައިވެރިންނަށް ރައީސް ޔާމީން ފެނިލުމުގެ އިތުރުން، އެމަނިކުފާނުގެ ސަރުކާރު ނިމުނުއިރު ހުންނެވި ނައިބު ރައީސް ޑރ. ޢަބްދުﷲ ޖިހާދު ވެސް މިއަދު ވަނީ މި އެއްވުމުގައި ބައިވެރިވެވަޑައިގެންފައެވެ.
