ރައީސް ޔާމީނަކީ ކަންނެތް ވެރިއެއްކަމަށް ވިދާޅުވުމުން އާދަމް ޝަރީފް ރައްދު ދެއްވައިފި
ރައީސް ޔާމީނަކީ ކަންނެތް ވެރިއެއްކަމަށް ރައްޔިތުންގެ މަޖިލީހުގެ ދަނގެތި ދާއިރާގެ މެމްބަރު އަދި ނޭޝަނަލް ޕާޓީ އުފެއްދެވުމުގައި އިސްކޮށް ހަރަކާތެެރިވަމުން އަންނަ ކާނަލް މުހައްމަދު ނާޒިމް ވިދާޅުވުމުން ޕީއެންސީގެ ނައިބު ރައީސް އަދި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ރައްދު ދެއްވައިފިއެވެ.
ރައީސް ޔާމީންއަށް ފާޑުވިދާޅުވެ ނާޒިމް ވިދާޅުވީ ރައީސް ޔާމީނަކީ ވަރަށް ކަންނެތް ބޭފުޅެއް ކަމަށާއި މާ ގިނަ މަސައްކަތް ކުރައްވާ އުޅުއްވި ބޭފުޅެއް ނޫން ކަމަށެވެ. މިކަމަށް ރައްދު ދެއްވައި އާދަމް ޝަރީފް ވިދާޅުވީ ރައީސް ޔާމީނަކީ ސިޔާސީ ގިނަ ލީޑަރުން އުފެއްދެވި ހަރުދަނާ ވެރިއެއްކަމަށެވެ.
"ރައީސް ޔާމީނަކީ ސިޔާސީ ގިނަ ލީޑަރުން އުފެއްދެވި ހަރުދަނާ ވެރިއެއް. ރައީސް ޔާމީން މޭ ކަރަން ޖެހޭ ވަރުގެ ސިޔާސީ މީހަކު، ޕާޓީއެއް، ވެރިޔަކު ރާއްޖެއަކު ނުހުންނާނެ" އާދަމް ޝަރީފް ވިދާޅުވިއެވެ.
އަވަސްއިން ގެނެސްދޭ ސުވާލަކަށް ފަހު ސުވާލެއް ޕްރޮގްރާމްގައި ވާހަކަ ދައްކަވަމުން ނާޒިމް ވިދާޅުވީ ރައީސް ޔާމީނަކީ ދިވެހިރާއްޖޭގެ ރައީސުލްޖުމްހޫރިއްޔާ ކަމަށް ދެން ގެންނަން ކުފޫ ހަމަވާ ބޭފުޅެއް ކަމަކަށް ގަބޫލު ނުކުރައްވާ ކަމަށެވެ.
ފިސްތޯލައެއް ގެންގުޅުނު ކަމަށް ބުނެ "ފްރޭމް"ކޮށް ޖަލަން ލާން ޖެހުނު ސަބަބެއް ނެތް ކަމަށާއި ރައީސް ޔާމީނާ އެކު ސިޔާސީ ގޮތުން މަސައްކަތް ކުރާނެ މަރުހަލާއެއް ނާންނާނެކަމަށް ވެސް ރައީސް ޔާމީންގެ ފުރަތަމަ ޑިފެންސް މިނިސްޓަރ ނާޒިމް ވަނީ މި ޕްރޮގްރާމްގައި ވިދާޅުވެފައެވެ.
Ads by STO
