އަޅުގަނޑަކީ އެމްޑީޕީ މެންބަރެއް، މަކަރު ހަދަން ފެށި ހިސާބުން ޕާޓީއަށް ކުރާ ތާއީދު ގެއްލިއްޖެ: ޖާބިރު

ކާށިދޫ ދާއިރާގެ މެންބަރު އަބްދުﷲ ޖާބިރަކީ އެމްޑީޕީ މީހެއް ކަމަށް އެމަނިކުފާނު ވިދާޅުވެއްޖެއެވެ.

Ads by STELCO

ސިވިލް ސާވެންޓުންގެ މުސާރަތައް ބޮޑު ނުކުރާ މައްސަލައިގައި އެ ފަރާތްތަކުގެ ކަންބޮޑުވުންތައް އަޑު އެހުމަށް ގޮވައިލާ މިއަދު މަޖިލީހަށް ހުށަހެޅުނު ކުއްލި މައްސަލައަށް ވާހަކަފުޅު ދައްކަވަމުން ޖާބިރު ވަނީ އެމްޑީޕީއަށް ވަރަށް ބޮޑަށް ފާޑު ވިދާޅުވެފައެވެ. މިގޮތުން ވިދާޅުވީ އެމަނިކުފާނު ވެސް އެމްޑީޕީއަށް ލޯބި ކުރައްވާ ކަމަށާއި ނަމަވެސް އެ ޕާޓީއަށް ކުރާ ތާއީދު ރައްޔިތުންނަށް އޮޅުވައިލާން ފެށިފަހުން ތާއީދު އަނބުރާ ގެނެސްފައިވާ ކަމަށެވެ.

"އެމްޑީޕީގެ ސައިޒް އަޅުގަނޑުމެންނަށް އަންޑަސްޑޭންޓް ވެއްޖެ. އަޅުގަނޑު މިއީ އެމްޑީޕީ މީހެއް. އަޅުގަނޑަކީ އެމްޑީޕީއަށް ލޯބި ކުރާ މީހެއް. އެހެން ނަމަވެސް މިހާރު އަޅުގަނޑު ތާއީދެއް ނުކުރަން އެމްޑީޕީއަކަށް. ސަބަބަކަށް ވަނީ އެމްޑީޕީއިން މަކަރު ހަދާތީ. ރައްޔިތުންނަށް އޮޅުވާލާތީ." ޖާބިރު ވިދާޅުވިއެވެ.

ޖާބިރަކީ އެމްޑީޕީ ބޭފުޅެއް ކަމަށް ވިދާޅުވި ނަމަވެސް އެ މަނިކުފާނު މަޖިލީހަށް އިންތިޚާބުވެ ވަޑައިގަތީ އަމިއްލަ ޓިކެޓްގައެވެ. އަދި މިހާރު ހުންނެވީ ޑީއާރޕީއާ ހަވާލުވެ ވަޑައިގެންނެވެ.

ޖާބިރުގެ ވާހަކަފުޅުގައި ވިދާޅުވީ އެމްޑީޕީގެ ވެރިކަމުގައި މި ޤައުމުގައި އެއްވެސް ކަމެއް ރަނގަޅަށް ނުވާ ކަމަށެވެ. އަދި ކޮންމެ ފަހަރަކު އެމްޑީޕީގެ ވެރިކަން ނިނުމަކަށް އަންނަ ކަމަށް ބުނެ ބަހަނާ ދައްކަމުން އަންނަ ކަމަށް ވިދާޅުވިއެވެ. އަދި ވިދާޅުވީ، މިހާރު މިއޮތް ސަރުކާރު ވެސް މިއަދު މިދަނީ ނިމެމުން ކަމަށާއި ރައްޔިތުންގެ ތާއީދެއް މި ސަރުކާރަށް ނެތް ކަމަށެވެ. އަދި މި ގޮތަށް މިފަދަ ކަންކަން ހިނގަނީ ރައްޔިތުންނަށް ވެފައިވާ ވައުދުތައް ނުފުއްދަވާތީ ކަމަށްވެސް ޖާބިރު ވިދާޅުވިއެވެ.

"ފުރަތަމަ ކަމަކަށް ވެރިކަމަށް އައި ދުވަހުން ފެށިގެން މިނިމަން ވޭޖެއް ކަނޑައަޅަން ބުނި. 10،000 ރުފިޔާ ކަނޑައަޅަންވީ ނޫންތޯ. މައްސަލައަކީ ދިވެހި ރާއްޖޭގައި ތަފާތު ކުރުން ބޮޑީ. އެއް މަޒްހަބެއްގެ ބައެއް އަޅުގަނޑުމެންނަކީ. އެއް މަޒްހަބެއްގެ ބައެއް." ޖާބިރު ވިދާޅުވިއެވެ.

ޖާބިރުގެ ވާހަކަފުޅުގައި އިތުރަށް ވިދާޅުވީ، މިހާރުން މިހާރަށް ސިވިލް ސާވެންޓުންގެ މުސާރަ 10،000 ރުފިޔާއަށް ބޮޑު ކުރަން ޖެހޭ ކަމަށެވެ. އަދި ރައްޔިތުން ތިބީ ވަރަށް ދަތި ހާލުގައި ކަމަށް ވިދާޅުވަމުން ބައެއް ސިވިލް ސާވެންޓުންނަށް ލިބެނީ 4000 ރުފިޔާ ކަމަށާއި މިފަދަ ހާލެއްގައި ދިރިއުޅުމުގެ ކަންކަން ކުރިޔަށް ގެންދާނީ ކިހިނެތްތޯ އޭނާ ވަނީ ސުވާލު ކުރައްވައިފައެވެ.