ރައީސް ނަޝީދަށް އަމާޒުކޮށްގެން ދިން ހަމަލާ: ދައުވާތަކަށް އަދުހަމް އެއްބަސްވެއްޖެ
ކުރީގެ ރައީސް އަދި ރައްޔިތުންގެ މަޖިލީހުގެ މިހާރުގެ ރައީސް މުޙައްމަދު ނަޝީދު އަވަހާރަ ކޮށްލަން އަމާޒުކޮށް ނިރުބަވެރި ހަމަލާއެއް ދިންކަމަށް ދައުވާ އުފުލިފައިވާ އަދުހަމް އަހްމަދު، އެ ދައުވާތަކަށް އެއްބަސްވެއްޖެއެވެ.
އަދުހަމްގެ މައްޗަށް ކުރާ ދައުވާތަކުގެ ޝަރީއަތް މިއަދު ފެށުމާ އެކު، އޭނާ މި ދައުވާތަކަށް އެއްބަސްވެފައި ވަނީ ދައުލަތާ އެކު އިއުތިރާފް އެއްބަސްވުމެއް ހަދައި އޭގައިވާ ގޮތަށެވެ. އަދުހަމް ކުށަށް އިއުތިރާފުވެ ތަހުގީގަށް އެއްބާރުލުން ދޭން ޝަރުތުކޮށް އޭނާގެ ކުށްތަކުގެ އަދަބަކަށް އެއްބަސްވެފައި ވަނީ 23 އަހަރަށް ޖަލަށް ލުމަށެވެ.
ކްރިމިނަލް ކޯޓުގައި އަދުހަމްގެ ޝަރީއަތް މިއަދު ވަކި ހިސާބަކަށް ފާޅުގައި ކުރިއަށް ގެންދިއުމަށް ފަހު، އަދުހަމާއި ދައުލަތުން ވެސް އެދިގެން ޝަރީއަތް ފަހުން ވަނީ ސިއްރުކޮށްފައެވެ.
ގައުމީ ސަލާމަތަށް ނުރައްކާވާ ބައެއް މައުލޫމާތު ހާމަވާނެތީ ޝަރީއަތުގެ އެ ބައި ސިއްރުކުރި ކަމުގައި ވިޔަސް، އެ ވާހަަތައް ދައްކައި ނިމުމުން ނޫސްވެރިނަށް އެ ޝަރީއަތަށް ވަދެވޭނެ ކަމަށް ބުނެފައިވެއެވެ.
އަދުހަމްގެ މި މައްސަލައިގެ ޝަރީއަތް ބަލަނީ ތިން ފަނޑިޔާރުންގެ ބެންޗަކުންނެވެ. އެއީ ފަނޑިޔާރު އާދަމް މުހައްމަދު، ފަނޑިޔާރު މުހައްމަދު މިސްބާހް އަދި ފަނޑިޔާރު ސޮފްވަތު ހަބީބެވެ.
މެއި މަހުގެ ހަވަނަ ދުވަހުގެ ރޭ، ރައީސް ނަޝީދަށް ދިން މި ހަމަލާގައި ސައިކަލެއްގައި އައިޑީއެއް ހަރުކޮށް ގޮއްވައިލައިފައި ވެއެވެ. ރިމޯޓަކުން އެ އައިޑީ ގޮއްވައިލީ އަދުހަމްއެވެ.
މި ހަމަލާގެ ސަބަބުން ރައީސް ނަޝީދަށް ބޮޑެތި ޒަހަމްތަކެއް ލިބުމުގެ އިތުރުން އެވަގުތު އެތަނުގައި ތިބި އެހެން މީހުންނަށް ވެސް އަނިޔާވިއެވެ.
