ދުނިޔޭގެ ޤައުމުތަކުން ރާއްޖެއަށް ކުރާއިތުބާރު ހާމަވެއްޖެ: ނައިބު ރައީސް
ދުނިޔޭގެ ޤައުމުތަކުން ދިވެހިރާއްޖެއަށް ކުރާ އިތުބާރު ހާމަވެއްޖެކަމަށް ނައިބު ރައީސް ފައިޞަލް ނަސީމް ވިދާޅުވެއްޖެއެވެ.
ފައިސަލް މިފަދައިން ވިދާޅުވީ ޕީ.އެސް.އެމްގެ ޚާރިޖީ ސިޔާސަތު ޕްރޮގްރާމްގެ މެހެމާނެއްގެ ގޮތުން ބައިވެރިވެވަޑައިގެން ވާހަކަފުޅު ދައްކަވަމުންނެވެ. ފައިސަލް ވިދާޅުވީ ރާއްޖެއަށް ކުރިއެރުމާއި ކާމިޔާބީ ހޯދެން އޮތީ ދުނިޔޭގެ ހުރިހާ ޤައުމުތަކާއެކުގައި ގުޅިގެން ކުރެވޭ މަސައްކަތުން ކަމަށެވެ.
ފައިސަލް ވިދާޅުވީ މި ސަރުކާރު ވެރިކަމަށް އައުމަށް ފަހު އެންމެ ފުރަތަމަ މަސައްކަތެއްގެ ގޮތުން ގުޅުން ކަނޑައިލެވިފައިވާ ބައިނަލްއަޤްވާމީ ޖަމްޢިއްޔާތަކާ އެކު އޮންނަ ގުޅުން އަލުން އިއާދަކުރުމުގެ މަސައްކަތް ކުރެވުނު ކަމަށެވެ. އެއާއެކު ދިވެހި ރައްޔިތުން ބޭނުންވި ގޮތަށް ދިވެހި ސަރުކާރުގެ ޚާރިޖީ ސިޔާސަތު ބައްޓަންކުރެވި، އެކި ޤައުމުތަކުގެ އެހީތެރިކަމާއި އެއްބާރުލުން ލިބިގެންގޮސްފައިވާ ކަމަށް ނައިބު ރައީސް ވިދާޅުވިއެވެ.
މީގެ އިތުރުން ދިވެހިރާއްޖެއަކީ ބޭރު ދުނިޔެއަށް ވަރަށް ބޮޑަށް ބަރޯސާވެފައިވާ ޤައުމެއްކަމަށާއި، އެގޮތުން ޓުއަރިޒަމަށް ނުވަތަ ބޭރު ފައިސާއަށް ބަރޯސާވާ މިންވަރު ވެސް އޮންނަނީ މުޅި ދުނިޔޭގެ އެހެން ޤައުމުތަކާ ގުޅިފައިކަމުގައި ވިދާޅުވިއެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، ދިވެހިރާއްޖެ މިހާރު މަސައްކަތް ކުރަމުންދަނީ ދުނިޔޭގެ އެންމެހާ ޤައުމުތަކާ ގުޅިގެން ކަމަށާއި ދިވެހިރާއްޖެއަށް ކުރިއެރުމާއި ކާމިޔާބީ ހޯދެން އޮތީ މުޅި ދުނިޔޭގެ ހުރިހާ ޤައުމުތަކާއެކު ގުޅިގެން ކުރެވޭ މަސައްކަތުން ކަމަށް ވިދާޅުވިއެވެ.
