ކުޑަކުދިން ރައްކާތެރިކުރުމަށް ޓަކައި، ޖިންސީގޯނާގެ ތުހުމަތު ކުރެވޭ މީހާ ބަންދުގައި ބެހެއްޓުން ކޮންމެހެން ބޭނުން: ހައިކޯޓު
ޖިންސީ ގޯނާގެ ތުހުމަތު ކުރެވިފައިވާ މީހުން ބަންދުގައި ކޮންމެހެން ބަހައްޓަން ޖެހެނީ މުޖުތަމަޢުގައި ހިމެނޭ ކުޑަކުދިން ރައްކާތެރިކުރުމަށް ޓަކައި ކަމަށް ހައިކޯޓުން ވިދާޅުވެއްޖެއެވެ.
16 އަހަރުގެ އަންހެން ކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ހައްޔަރުކުރި މީހަކު ދޫކޮށްލަން މެދު ރާއްޖެތެރޭގެ މެޖިސްޓްރޭޓް ކޯޓަކުން ކުރި އަމުރު ބާތިލްކޮށް، އޭނާ ޝަރީއަތް ނިމެންދެން ބަންދުކުރަން ކުރި ހުކުމްގައި ހައިކޯޓުން ވިދާޅުވެފައި ވަނީ ޖިންސީ ގޯނާގެ ތުހުމަތު ކުރެވިފައިވާ އދ. ދިގުރަށް / ފެންފިޔާޒްގެ، މުހައްމަދު އުސްމާންގެ ފަރާތުން އިތުރު ކުޑަކުއްޖަކަށް ކުރިމަތިވެދާނެކަމުގެ އިޙްތިމާލު ވެސް އޮތަތީ މުޖުތަމަޢުގައި ހިމެނޭ ކުޑަކުދިންގެ ރައްކާތެރިކަމަށް ޓަކައި، މުޙައްމަދު ޢުޘްމާން ބަންދުގައި ބެހެއްޓުން ކޮންމެހެން މުހިއްމުކަމަށް ދެކޭ ކަމަށެވެ.
ފަނޑިޔާރު މުހައްމަދު ފައިސަލްއާއި ފަނޑިޔާރު އަބްދުالله ހަމީދާއި ފަނޑިޔާރު ހަސަން ޝަފީއު ހިމެނޭ ފަނޑިޔާރުންގެ ބެންޗުން ނިންމައިފައިވާ މިމައްސަލައިގައި ބަންދާމެދު ގޮތެއް ނިންމުމަށް ފަނޑިޔާރެއްގެ ކުރިމައްޗަށް ފުރަތަމަ ހާޒިރުކުރި މަޖިލީހުގައި އޭރު މައްސަލައިގެ ހެކި ބަސް ޝަރީއަތަށް ނުނަގާއިރު، ހެއްކަށް ނުފޫޒު ފޯރުވުމުގެ ފުރުސަތު ވަރަށް ފުޅާކޮށް އޮތް ކަމަށް ހައި ކޯޓުގެ ހުކުމްގައި ވަނީ ފާހަގަކޮށްފައެވެ. އެހެންކަމުން މިފަދަ ހާލަތެއްގައި ހުރި ފަރާތެއްކަމުގައިވާ ނަމަ އެފަރާތް ހުންނަންވާނީ ހެކިންނަށް ނުފޫޒު ފޯރުވުމުގެ ހުރިހާ ފުރުސަތެއް ނެތިކޮށްލެވޭ ފަދަ ތަނެއްގައި ކަމަށާއި އޭނާ މިނިވަންވެފައި ހުންނަ ނަމަ، އެ ފުރުސަތު ނެތިކޮށްނުލެވޭނެ ކަމަށް ހައި ކޯޓުން ވަނީ ފާހަގަކޮށްފައެވެ.
16 އަހަރުގެ އަންހެން ކުއްޖަކަށް ޖިންސީގޯނާކުރި ކަމުގެ ތުހުމަތުގައި ހައްޔަރުކުރި މީހަކު ޝަރުތުތަކަކާ އެކު މެޖިސްޓްރޭޓް ކޯޓުން ކުރި އަމުރު ހައި ކޯޓުން ވަނީ ބާތިލްކޮށްފައެވެ. އަދި މިމައްސަލައިގައި ތުހުމަތުވާ މީހާ ޝަރީއަތް ނިމެންދެން ބަންދުގައި ބަހައްޓަން އަމުރުކޮށް އެ ކޯޓުން މެއި 31ގައި ނެރުނު އަމުރު ދެމި އޮތް ކަމަށް އެ ކޯޓުން ވަނީ ކަނޑައަޅައިފައެވެ.
ކުޑަ ކުދިންނޭ ކިޔާފަ ގާނޫނުތައް ހަދަހދާގެން ބަލީޙް ވެފާތިބޭ ބޮޑެތި ނުބާނުލަފާ ހަސިވިއްކާ އަންހެނުން ދިފާއު ކުރާ އަދުލް ވަންތަ އިންސާފް