ދިވެހިންނަކީ ކަންނެތް ބައެއް ނޫން، ނެތީ ފުރުސަތު: ޝިޔާމް

ދިވެހިންނަށް ބަންދުވެފައިވާ ވަޒީފާގެ ފުރުސަތުތަކުގެ ވާހަކަ ދައްކާ ކޮންމެ ފަހަރަކު، ދިވެހިން ކަންނެތޭ ބުނެ ބަހަނާ ދެއްކުމުގެ ބަދަލުގައި ހެދިފައިވާ ޤާނޫނުތައް ތަންފީޒް ކުރަން ތަންފީޒީ އިދާރާތަކަށް ރައްޔިތުންގެ މަޖިލީހުގެ ނައިފަރުު ދާއިރާގެ މެމްބަރު އަޙްމަަދު ޝިޔާމް މިއަދު ގޮވައިލައްވައިފިއެވެ.

Ads by MWSC

ދިވެއްސަކު ނިވައިފައްގަނޑަކަށް ވެގެން ހުރެ، ބިދޭސީއަކަށް މަންފާވާނެ ގޮތަށް ކުރަމުންދާ ވިޔަފާރި ހުއްޓުވުމަށް، ސަރުކާރުގެ ފަތުން، ކުރެންދޫ ދާއިރާގެ މެންބަރު ޢަބްދުލްޣަނީ ޢަބްދުލްޙަކީމް ހުށަހަޅުއްވައިފައިވާ، ޤާނޫނު ނަންބަރު 2014/19 (އަމިއްލަ ފަރުދުންގެ ވިޔަފާރި)އަށް އިޞްލާޙު ގެނައުމުގެ ބިލަށް ވާހަކަފުޅު ދައްކަވަމުން ޝިޔާމް ވިދާޅުވީ، މިއަދު ދިވެހި ރާއްޖެއަށް ދިމާވެފައިވާ އެންމެ ބޮޑު ބިރުވެރިކަމަކީ، އަދުލު އިންސާފާ ހަމަހަމަކަން ނެތްކަމުގެ ބިރު ކަމަށެވެ. އަދި މި ބިރު ވިޔަފާރިވެރިންއިން ފެށިގެން އެންމެ އާދައިގެ މީހާއާ ހަމައަށް އޮންނަ ކަމަށާއި ކަންކަމުގައި ކުރިޔަށް ދިއުމުގެ ހިތްވަރެއް ނުހުންނަކީ މިހެންވެ ކަމަށެވެ. މިހެންކަމުން، ދިވެހިން ކަންނެތޭ ކިޔާ ބަހަނާ ދެއްކުމުގެ ބަދަލުގައި ޤާނޫނުތައް ތަންފީޒް ކުރުމަށް ޝިޔާމް ގޮވައިލެއްވިއެވެ.

"ވަރަށް ގިނަ ފަހަރަށް މިފެންނަނީ ވިޔަފާރިތަކާ ބެހޭ ވަޒީރުންނާއި އެހެން ބޭފުޅުން ވެސް ދިވެހިން ކަންނެތް ވާހަކަ ދައްކާ ތަން. ދިވެހިން ކަންނެތް ވާހަކަ ދެއްކުމުގެ ބަދަލުގައި ޤާނޫންތައް ތަންފީޒް ކުރަންވީ. ތަންފީޒީ އިދާރާތަކުން" ޝިޔާމް ވިދާޅުވިއެވެ.

ޝިޔާމްގެ ވާހަކަފުޅުގައި ހުށަހެޅުނު އިސްލާޙާ ބެހޭ ގޮތުން ވިދާޅުވީ، ހުށަހެޅުނު އިސްލާޙްގައިވާ ކަންތައްތަކަށް ތާޢީދު ކުރާ ކަމަށާއި އެހެން ނަމަވެސް ރާއްޖޭގައި މިއަދު ޖެހިގެން އުޅޭ މައްސަލައަކީ ޤާނޫނު ނެތުމުގެ މައްސަލަ ނޫން ކަމަށާއި ޤާނޫން ތަންފީޒް ނުވުމުގެ މައްސަލަ ކަމަށެވެ.

"މީގަ މިއުޅެނީ ޤާނޫނެއް ނެތިގެނެއް ނޫން. ނޫނީ ޤާނޫނަކަށް ގެންނަން ޖެހޭ އިސްލާހެއް ނުގެނެވިގެނެއް ވެސް ނޫން. ދިވެހި ރާއްޖޭގައި ދިވެހިންނަށް ފުރުސަތުތައް ފަހި ނުވެގެން. ކުދި އަދި މެދުފަންތީގެ ވިޔަފާރިތައް ފުޅާ ނުވެގެން މިއުޅެނީ ޤާނޫނަކަށް ގެންނަން ޖެހޭ އިސްލާހެއް ނެތިގެނެއް ނޫން. ބިދޭސީން ހުރިހާ ވިޔަފާރިތަކެއްގައި އެމީހުންގެ ނެޓްވޯކްތައް އެހާ ވަރުގަދަ. އެ ނެޓްވޯކްގެ ތެރެއިން ދިވެހިންނަށް، ދިވެހި ޒުވާނުންނަށް ވިޔަފާރި ކުރުމުގެ މަގުތައް ހުރީ ބަންދުވެފައި. ވިޔަފާރި ތެރެއަށް ދިވެހިންނަށް ޕެނެޓްރޭޓްވާން ވަރަށް އުދަނގޫ. ޤާނޫނެއް ނެތިގެނެއް ނޫން. އިސްލާހެއް ނެތިގެނެއް ނޫން. ޤާނޫންތައް ތަންފީޒް ނުވަނީ." ޝީޔާމް ވިދާޅުވިއެވެ.

ޝިޔާމްގެ ވާހަކަފުޅުގައި ދިވެހި ސަރުކާރުގެ ވުޒާރާތަކުގެ އިސްވެރިންނަށް ތުހުމަތުތަކެއް ކުރެއްވިއެވެ، މިގޮތުން ވިދާޅުވީ، ދިވެހި ރާއްޖޭގައި ވުޒާރާ ވުޒާރާތަކުގައި ތިއްބެވި ބޭފުޅުން ބޮޑެތި އޮފްލައިން ޓްރާންސެކްޝްންތައް ހިންގަވާ މަނީ ލޯންޑަރ ކުރާ ކަމަށެވެ. އަދި ދައުލަތުގެ ފައިސާ މިގޮތަށް ބޭނުން ކުރުމުން އެކަމުގެ ނިކަމެތިކަން އަންނަނީ ކުދި އަދި މެދުފަންތީގެ ވިޔަފާރިތަކަކަށް ކަމަށް ޝިޔާމް ވިދާޅުވިއެވެ.