ޝަމީމާއި ދައުލަތުގެ އިހުމާލުގެ ޒިންމާ ސްޕްރީމްކޯޓުގެ ފަނޑިޔާރުން އުފުލާކަށް ނުޖެހޭ: އަލީ ވަހީދު
ޕްރޮސެކިއުޓަރ ޖެނެރަލް ހުސައިން ޝަމީމްގެ ނާގާބިލުކަމާއި އޭނާ ހަދައިފައިވާ ޑީލްތަކުން ސިލެކްޓިވް ޖަސްޓިސް ނުވަތަ ޕިކް އެންޑް ޗޫސް ޕަރސެކިއުޝަންތައް ހާމަވާ ކަމަށާއި ޝަމީމާއި ދައުލަތުގެ އިހުމާލާއި މުޑުދާރުކަމުގެ ޒިންމާ ސްޕްރީމްކޯޓުގެ ފަނޑިޔާރުން އުފުލަން ނުޖެހޭނެކަމަށް ކުރީގެ ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
އަލީ ވަހީދު މިއަދު ކުރެއްވި ޓްވީޓްތަކެއްގައި ސަރުކާރާއި ޕީޖީ ޝަމީމްއަށް ވަނީ ވަރަށް ބޮޑަށް ފާޑުވިދާޅުވެފައެވެ. މިގޮތުން މިވެރިކަމަށް 3 އަހަރުވީ އިރު ‘މަނީ ޓްރެއިލް’އިން ރައްޔިތުންނަށް ރިކަވާ ކުރެވުނީ ކިތައް ފައިސާތޯ އޭނާ ވަނީ އައްސަވައިފައެވެ.
"ސްޕްރީމް ކޯޓަށް ވަދެ ޖިލްބާބު ގަމީހާ ކޯޓު ފަޓުލޫނާ އެކު ތިމަންނަމެން މިތިބީ ‘ފާސިޤުން’ނާ އެކު ރައްޔިތުންނަށް ޓަކައި ޑީލު ހަދައިގެންކަމަށް ބުނާއިރު، މިވެރިކަމަށް 3 އަހަރުވީ އިރު ތިޔަ ވިދާޅުވާ ‘މަނީ ޓްރެއިލް’އިން ރައްޔިތުންނަށް ރިކަވާ ކުރެވުނީ ކިތައް ފައިސާތޯ؟ ބައިރުފިޔާ ވެސް ނުލިބޭ" އަލީ ވަހީދުގެ ޓްވީޓްގައި ވިދާޅުވިއެވެ.
އޭނާ އިތުރަށް ވިދާޅުވީ ޕީޖީ ފެއިލްވެފައިވާކަމަށާއި "ފާސިގުންނާ އެކު" ޕީޖީން ޑީލް ހެދީ އެންމެ ބޭނުމެއްގައި ކަމަށެވެ. އަދި އެ ބޭނުމަކީ އެމްއެމްޕީއާރުސީ ލިސްޓް އޮޅުވައިލުން ކަމަށް ވެސް އޭނާ ވަނީ ތުހުމަތު ކުރައްވައިފައެވެ.
މިވަގުތު އިނގިރޭސި ވިލާތުގައި ހުންނެވި އަލީ ވަހީދު ވަނީ މިދިޔަ ހަފްތާގައި "ދައުލަތް އޮރިޔާން" ކޮށްލުމަށް ކަމަށް ބުނެ ނޫސްވެރިންގެ ބަައްދަލުވުމެއް ބާއްވައިފައެވެ. އަދި މި ނޫސްވެރިންގެ ބައްދަލުވުމުގައި އަލީ ވަހީދު ވިދާޅުވީ އެމްއެމްޕީއާރްސީގެ ޚިޔާނާތުގެ ފައިސާ ނެގި މީހުންގެ ތެރޭގައި އެމްޑީޕީގެ އޭރުގެ އެންމެ އިސް 5 މީހުންގެ ތެރޭގައި ހިމެނިވަޑައިގަންނަވާ ބޭފުޅެއް ހިމެނޭ ކަމަށެވެ. އެމީހެއްގެ ނަން ހާމަ ކުރަން ބޭނުން ނުވާ ކަމަށް ވިދާޅުވެ އަލީ ވަހީދު ވިދާޅުވީ، އެ ބުނާ ބޭފުޅަކު ކަޅު ދަބަހެއްގައި 35 މިލިޔަނަށް ވުރެ ގިނަ ފައިސާ ގެންގޮސްފައިވާ ކަމަށެވެ. އެއީ ކާކުތޯ ނޫސްވެރިން ތަކުރާރުކޮށް ސުވާލު ކުރުމުން އަލީ ވަހީދު ވިދާޅުވީ އެމްއެމްޕީއާރްސީގެ ޚިޔާނާތުގެ މައްސަލައިގައި ރައީސް ޞާލިޙްގެ ނަންފުޅު ވެސް ފުރަތަމަ އޮތް ކަމަށެވެ. ނަމަވެސް ރައީސް ޞާލިޙްގެ ނަން ލިސްޓުން އުނި ކުރެއްވީ، އެސިސްޓެންޓް ކޮމިޝަނަރ އޮފް ޕޮލިސް މުޙައްމަދު ރިޔާޒު ކަމަށް ވެސް އަލީ ވަހީދު ވިދާޅުވިއެވެ.
ޢަލީ ވަޙީދުގެ ތުހުމަތުތައް ދައުލަތުން ވަނީ ދޮގު ކުރައްވައިފައެވެ.
މާ ވާހަކަ ގިނަވަނީ . .. ހިގާދެން ކޮންމެވެސް އެހެންކަމަކާ އުޅެން