އަސްހަދަށް ފިޔަވަޅު އަޅައިދޭން ދެވަނަ ފަހަރަށް އެދުމުން ވެސް ފިޔަވަޅު އަޅައިނުދިން!
ޖިންސީ ގޯނާއާއި ރޭޕްގެ ދައުވާތަކެއް އުފުލިފައިވާ ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖެއިން ބޭރަށް ވަޑައިގަތުމަށް ހުއްދަ ދިނުމުގައި ކުރި ޝަރުތުތަކާ ހިލާފް ވެފައިވާތީ އެ މައްސަލައިގައި އޭނާއަށް ޖާމިނުވި، އަސްހަދު އަލީ (އަޑުބަރޭ)އަށް ފިޔަވަޅު އަޅައިދޭން ކްރިމިނަލް ކޯޓުގައި ދެވަނަ ފަަހަރަށް އެދުމުން ވެސް ފިޔަވަޅު ނާޅަން އެ ކޯޓުން ނިންމައިފިއެވެ.
ބޭސްފަރުވާއަށް ރާއްޖެއިން ބޭރަށް ވަޑައިގަތުމަށް އަލީ ވަހީދަށް ހުއްދަދީފައި ވަނީ މި އަހަރުގެ ފެބްރުއަރީ މަހުގައެވެ. އޭނާއަށް އެ ހުއްދަ ކޯޓުން ދިނީ އޭނާ އެނބުރި ވަޑައިގަންނަވާނެކަމުގެ ޔަގީން ކަމެއްގެ ގޮތުން އަޑުބަރޭ ކޯޓުގައި ޖާމިނުވުމުންނެވެ.
ނަމަވެސް މުއްދަތު ހަމަވިއިރު ވެސް، އަލީ ވަހީދު އެނބުރި ރާއްޖެ ވަޑައިނުގަތުމުން އަޑުބަރޭއަށް ފިޔަވަޅު އަޅައިދޭން ދައުލަތުން އެދުނަސް، ކްރިމިނަލް ކޯޓުން ނިންމީ އޭނާއަށް ފިޔަވަޅު ނޭޅޭނެ ކަމަށެވެ.
އަލީ ވަހީދުގެ ޕާސްޕޯޓު ހިފަހައްޓަން ދައުލަތުން ހައި ކޯޓަށް ދިޔުމުން، ދައުލަތުން އެދުނީ ކެންސަލް ކޮށްފައިވާ ޑިޕްލޮމެޓިކް ޕާސްޕޯޓް ހިފަހައްޓަން ކަމަށް ވާތީ އެފަދަ އަމުރެއް އެ ކޯޓުން ނެރެނުދިނެވެ.
Ads by STO
