މަހްމޫދު މަރައިލުމުގައި ބައިވެރިވެފައިވާ ފަރާތްތައް ހޯދާ އިންސާފުގެ ކުރިމައްޗަށް ގެނައުމަށް ޕީޕީއެމުން ގޮވައިލައިފި
އދ. ދަނގެތީގައި ވަރަށް ރަހުމު ކުޑަ ގޮތަކަށް އެ ރަށުގެ ވިޔަފާރި ވެރިޔެއް ކަމަށްވާ މަޙުމޫދު އަބޫބަކުރު މަރައިލާ ފަޅު ގެއެއްގެ ވަޅަކަށް އެއްލައިލައިފައިވާ މައްސަލައިގައި ޕީޕީއެމުން ކަންބޮޑުވުން ފާޅުކޮށްފިއެވެ.
ޕީޕީއެމުން ވިދާޅުވީ މަރްޙޫމް މަޙަމޫދު އަބޫބަކުރު އަނިޔާވެރި ގޮތަކަށް މަރައިލުމުގެ ފަހަތުގައިވާ ސަބަބުތައް ހޯދުމަށާއި، މިޢަމަލު ހިންގުމުގައި އެކި ގޮތްގޮތުން ބައިވެރިވެފައިވާ ހުރިހާ ފަރާތްތަކެއް އިންސާފުގެ ކުރިމައްޗަށް ގެނައުމަށް ކުރެވޭ މަސައްކަތް އަވަސް ސްޕީޑެއްގައި ކޮށް، އެފަރާތްތައް އިންސާފުގެ ކުރިމައްޗަށް ގެނެސް ޤާނޫނުތަކުން ކަނޑައަޅާފައިވާ އެންމެ ހަރުކަށި އަދަބު ދިނުމަށް ކަމާ ބެހޭ އެންމެހާ މުއައްސަސާތަކަށް ގޮވައިލައިފައެވެ. އަދި އދ. ދަނގެއްޗަށް ކުރިމަތިވެފައިވާ ބިރުވެރިކަމުން އެ ރަށުގެ ރައްޔިތުން ސަލާމަތް ކުރުމަށް ޓަކައި އަޅަން ޖެހޭ އެންމެހާ ފިޔަވަޅުތައް އަވަސް ކުރުމަށް ވެސް ޕީޕީއެމުން ވަނީ ގޮވައިލައިފައެވެ.
ޕީޕީއެމުން ވަނީ އަލްމަރްޙޫމް މަޙުމޫދު އަބޫބަކުރުގެ ޢާއިލާއަށާއި ދަނގެތީ ރައްޔިތުންނަށް ކުރިމަތިވެފައިވާ ފުން ހިތާމައިގައި ޕީޕީއެމްގެ އެންމެހާ މެންބަރުން ބައިވެރިވެ، މަރްޙޫމްގެ ޢާއިލާއާއި ދަނގެތީ ރައްޔިތުންނަށް ރައީސް ޢަބްދުﷲ ޔާމީންޢަބްދުލްޤައްޔޫމާއި އެކޯލިޝަންގެ ލީޑަރޝިޕާއި، ކައުންސިލް މެންބަރުންނާއި، ޕާލަމަންޓްރީ ގްރޫޕްގެ މެންބަރުންނާއި ސްޓިއަރިންގ ކޮމިޓީތަކާއި އަދި އެ ކޯލިޝަނަށް ނިސްބަތްވާ ދެ ޕާޓީގެ އެންމެހާ މެންބަރުންގެ ނަމުގައި ތަޢުޒިޔާ ދަންނަވައި، މަރްޙޫމްގެ ޢާއިލާއަށް ކެތްތެރިކަން މިންވަރު ކުރެއްވުމަށާއި މި އަނިޔާވެރި ޢަމަލު ހިންގި ފަރާތްތައް އިންސާފުގެ ކުރިމައްޗަށް ގެނައުމަށް ކުރެވޭ މަސައްކަތުގައި ކާމިޔާބީ މިންވަރު ކުރެއްވުން އެދި ދުޢާ ދަންނަވައިފައެވެ.
