ކަނޑަށް ވެއްޓިގެން ނިޔާވި މީހާގެ މޫނު ބައްލަވައިލައްވަން ރައީސް ޞާލިޙް ވަޑައިގެންފި

އިއްޔެ ހަވީރު މާލެއިން ފުރައިގެން ވ.އަތޮޅަށް ދަތުރު ކުރި ލޯންޗެއް ރާޅެއްގައި ޖެހި ކަނޑަށް ވެއްޓިގެން ނިޔާވި، އުމުރުން 33 އަހަރުގެ މަރިޔަމް ނާހިދާގެ މޫނު ބައްލަވައިލެއްވުމަށް ރައީސް އިބްރާހީމް މުޙައްމަދު ޞާލިޙް ވަޑައިގެންފިއެވެ.

Ads by Hajj Corporation

ރާޅެއްގައި ޖެހި ލޯންޗްގައި ތިބި ތިން މީހަކު ކަނޑަށް ވެއްޓުނެވެ. ނިޔާވި ނާހިދާގެ ހަތަރު އަހަރުގެ ފިރިހެން ދަރިފުޅު ވަނީ ކަނޑަށް ގެއްލިފައެވެ. އެކުއްޖާ އަދިވެސް ނުފެނެއެެވެ.

ހަވީރު 5:30 ހާއިރު އޮޅުވެލި ރިސޯޓް ކައިރީ ހިނގި މި ހާދިސާގައި ހިނގިއިރު ލޯންޗްގައި 12 މީހުން ތިއްބެވެ.

ކަނޑަށް ވެއްޓުނު ނާހިދާގެ ހަށިގަނޑު ނަގައި ކ. ގުރައިދޫ ހެލްތު ސެންޓަރަށް ގެންދިޔައިރު ވެސް އޭނާ އޮތީ ނިޔާވެފައެވެ.

ކުއްޖާ ހޯދުމުގެ މަސައްކަތް އެމްއެންޑީއެފްއިން އަދިވެސް ކުރަމުން އަންނައިރު، އެ ފަރާތުން ވިދާޅުވީ، ކަނޑު ގަދަވުމާއި ވިއްސާރަވުމުގެ ސަބަބުން ބައެއް ލިމިޓޭޝަން އެބަހުރި ކަމަށެވެ. އަދި ކުއްޖާ ހޯދުމުގައި އިންޑިއާއިން ހަދިޔާކޮށްފައިވާ ޑޯނިއާ ބޭނުން ނުކުރާތީ އެކަމާ ގުޅިގެން ނޫސްވެރިޔަކު ކުރި ސުވާލަކަށް ޖަވާބު ދެއްވަމުން އެމްއެންޑީއެފްއިން ވިދާޅުވީ، ޑޯނިއާ އޮތީ ޓެކްނިކަލް މައްސަލައެއް ޖެހިގެން ގްރައުންޑްވެފައި ކަމަށެވެ.