އާރްޔަންއާ އެކު ކޮށްފައިވާ ޗެޓުތަކެއް ފެންމަތިވެ އަނަންޔާ އެންސީބީއަށް ހާޒިރުކޮށްފި
ބޮލީވުޑްގެ ސުޕާސްޓާ ޝާހްރުކް ޚާންގެ ދޮށީ ދަރިފުޅު އާރްޔަން ޚާންގެ ޑްރަގް ވޭދަނައާ ގުޅޭ ގޮތުން ސުވާލު ކުރަން އެކްޓްރެސް އަނަންޔާ ޕާންޑޭ މިއަދު ދެ ފަހަރަށް އެންސީބީއަށް ހާޒިރު ކޮށްފިއެވެ.
އާރްޔަންއާއި އަނަންޔާއަކީ ކުޑައިރުއްސުރެ ދެ އެކުވެރިން ކަމަށްވާއިރު، އާރްޔަންގެ ކޮއްކޮ ސުހާނާއަކީ އަނަންޔާގެ އެއް "ބެސްޓް ފްރެންޑް" ކަމަށް ވެސް މީގެ ކުރީގެ އިންޓްވިއުއެއްގައި ވަނީ ބުނެފައެވެ.
މަސްތުވާތަކެތީގެ މައްސަލައިގައި އާރްޔަން މިހާރު ހައްޔަރުކޮށްފައިވާ އިރު، އެންސީބީން ދަނީ އެ މައްސަލަ އިތުރަށް ތަހުގީގުކޮށް އޭނާއާ އެކު އެކަމުގައި އިތުރު ބަޔަކު ޝާމިލުވޭތޯ ވެސް ބަލަމުންނެވެ.
އެގޮތުން އެ މައްސަލައިގައި އެންމެ ފަހުން ބޭއްވުނު ޝަރީއަތުގެ އަޑުއެހުމުގައި އެންސީބީން ބުނެފައި ވަނީ ވަޓްސްއެޕް މެދުވެރިކޮށް އާރްޔަންއާއި އަނަންޔާ ދައްކާފައިވާ ވާހަކަތަކަކާ ގުޅޭގޮތުން އަނަންޔާއާ ވާހަކަ ދައްކަން ބޭނުންވާ ކަމަށެވެ.
އެ ޗެޓުތަކުގެ ސްކްރީންޝޮޓްތަކެއް ވެސް ކޯޓަށް ހުށަހެޅުމުން، ކޯޓުން ވަނީ އަނަންޔާއާ ސުވާލު ކުރުމުގެ ހުއްދަ ދީފައެވެ.
މި މައްސަލައާ ގުޅިގެން ސުވާލު ކުރަން އަނަންޔާ މިއަދު ހެނދުނުގެ ވަގުތެއްގައި ހާޒިރު ކުރުމަށް ފަހު، މެންދުރު ފަހު ވެސް ވަނީ ހާޒިރު ކޮށްފައެވެ.
ރިޕޯޓުތަކުން ބުނާ ގޮތުގައި އަނަންޔާ ދެވަނަ ފަހަރަށް އެންސީބީއަށް ހާޒިރުވީ އޭނަގެ ބައްޕަ ޗަންކީ ޕާންޑޭއާ އެކުގައެވެ. އަދި އެންސީބީގެ ތެރެއަށް ވަނުމުގެ ކުރިން އަނަންޔާ ވަރަށް ރުއި ކަމަށް ވެސް ބުނެފައިވެއެވެ.
