ނަޝީދަށް ޓަކައި ރައްޔިތުންގެ ފައިސާއިން ދުވާލަކަށް 6،000 ޑޮލަރު ޖެންއަށް ދައްކައިގެން ނުހުރެވޭނެ: ޝުޖާއު
ދިވެހިރާއްޖޭގެ ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދަށް ރައްކާތެރިކަން ކަށަވަރު ކުރުމުގެ ނަމުގައި ރައްޔިތުންގެ ޓެކްސް ފައިސާއިން ހޮޓެލް ޖެންއަށް ދުވާލަކަށް 6000 (ހަހާސް) ޑޮލަރު (-/92،520 ރފ.) ދައްކަވައިގެން ނުހުރެވޭނެ ކަމަށް ޕީޕީއެމްގެ ނައިބު ރައީސް އަދި މާލެ ސިޓީ ކައުންސިލް ހުޅުމާލެ ދާއިރާ މެމްބަރު އިބްރާހިމް ޝުޖާޢު ވިދާޅުވެއްޖެއެވެ.
ޕީޕީއެމްގެ ޖަގަހަ ޖަލްސާގައި ވާހަކަ ދައްކަވަމުން ޝުޖާޢު ވަނީ މިސަރުކާރުން ދަނީ ދިވެހި ރައްޔިތުންގެ ޓެކްސް ފައިސާ ހިތުހުރި ގޮތަކަށް ބޭނުން ކުރަމުން ކަމަށާއި ރައްޔިތުންގެ ފައިސާއަށް ހަރާމްކޯރު ވަމުންދާ ކަމަށް ވިދާޅުވެ ވަރަށް ބޮޑަށް ފާޑު ވިދާޅުވެފައެވެ.
"އަޅުގަނޑުމެން ރައްޔިތުން ނުބުނަން ދިވެހިރާއްޖޭގެ ރައްޔިތުންގެ މަޖިލީހުގެ ރައީސް ހުންނަން ވާނީ ދުވާލަކަށް ރައްޔިތުންގެ ފައިސާއިން 6000 (ހަހާސް) ޑޮލަރު (-/92،520 ރފ.) ދޭ ހޮޓަލެއްގައޭ ބަހައްޓާފަ. ކޮންމެ ރައްޔިތަކަށް ވެސް، އަދި ކޮންމެ ލީޑަރަކަށް ވެސް އަދި އިދިކޮޅުފަރާތެއް ކަމުގައި ވީ ނަމަވެސް، އަދި ސަރުކާރުގެ ފަރާތެއް ކަމުގައި ވީ ނަމަވެސް، ރައްޔިތުންގެ މަޖިލީހުގެ ރައީސް ކަމުގައި ވީނަމަވެސް އަދި ޤައުމުގެ ރައީސުލް ޖުމްހޫރިއްޔާކަމުގައި ވީނަމަވެސް، ދައުލަތުން އެމީހަކަށް ދޭންޖެހޭ ހިމާޔަތާއި ރައްކާތެރިކަން ކަށަވަރުކޮށް ދިނުމަކީ އެއީ ޤާނޫނު އަސާސީގައި ލާޒިމުކުރާ ކަމެއް. ޤާނޫނުގައި ލާޒިމުކުރާ ކަމެއް. އޭގެ މާނައެއް ނޫން ސަލާމަތާއި ރައްކާތެރިކަން ކަށަވަރު ކުރުމަކީ ދައުލަތުގެ ޒިންމާއެކޭ " ޝުޖާޢު ވިދާޅުވިއެވެ.
ރައީސް އިބްރާހިމް މުޙައްމަދު ޞާލިޙުގެ ޒިންމާއަކީ މަޖިލީހުގެ ރައީސް އަދި އިދިކޮޅު ލީޑަރުގެ ސަލާމަތާއި ރައްކާތެރިކަން ކަށަވަރު ކުރުން ކަމަށާއި، އެހެން ނަމަވެސް އޭގެ މާނައަކީ އަމާންކަމާއި ރައްކާތެރިކަން ނެތްކަމަށް ބުނެ ރައްޔިތުންގެ ފައިސާއިން މަޖިލީހުގެ ރައީސް ހޮޓަލެއްގައި ބެހެއްޓެވުން ނޫން ކަމަށާއި އަދި މިކަން ބަލައިނުގަނެވޭނެ ކަމަށް ވެސް ޝުޖާޢު ވިދާޅުވިއެވެ.
"ރައްޔިތުންގެ މަޖިލީހުގެ ރައީސް ޗުއްޓީ ހޭދަކުރަން ބައްދަލުވުންތަކަށް ރިސޯޓްތަކަށް ދާއިރު، އޭނަގެ ސެކިއުރީޓީންނަށް ހަ ރޫމް ދިވެހި ރައްޔިތުންގެ ފައިސާ ދީގެން ހިފާފަ ބަހައްޓާކަށް ނުޖެހޭނެ." ޝުޖާޢު ވިދާޅުވިއެވެ.
މީގެ އިތުރުން ވެސް ޝުޖާއު ވަނީ ރައީސް ޞާލިޙް ތަންތަނަށް ވަޑައިގަންނަވާއިރު ގޯޅިތައް ބަންދުކުރުމުން "ރައްޔިތުންނަށް ދުއްތުރާވާކަމަށް" ވިދާޅުވެ ރައީސްއަށް ވަރަށް ބޮޑަށް ފާޑު ވިދާޅުވެފައެވެ.
"އަޅުގަނޑުމެންނަށް މިއަދު މިފެނިގެން ދަނީ ރައީސުލް ޖުމްހޫރިއްޔާ ދާއިރު ރައީސުލް ޖުމްހޫރިއްޔާ ގޯޅިޔަކަށް ވަދެއްޖެއްޔާ އިންވެގެން އިން ހަ ގޯޅި ބަންދުކޮށް ރައްޔިތުންނަށް ދުއްތުރާކުރަމުން ދާ މަންޒަރު ." ޝުޖާޢު ވިދާޅުވިއެވެ.
ރައްޔިތުން ނުކައި ނުބޮއި، ކަރަންޓު ބިލާއި ފެން ބިލު ނުދެއްކިގެން އުޅޭއިރު ރައްޔިތުންގެ ޓެކްސް ފައިސާ މިގޮތަށް ހޭދަކުރުމަކީ ރައްޔިތުންނަށް ހަރާންކޯރުވުން ކަމަށް ވެސް ޝުޖާޢު ވިދާޅުވިއެވެ. އަދި ރައްޔިތުން މިކަންކަމާ ފުންކޮށް ވިސްނުމަށް ޝުޖާޢު ވަނީ ގޮވައިލައްވައިފައެވެ.
މީނާއަކީ މަންޑޭލާއޯ ، އެކަމަކު މިއުޅެނީ ރައްޔިތުންގެ ލާރިގަނޑު ކާލަންވެގެން
ރައްޔިތުން ނަަށް އޮޅުވާލަނީ … މިމީހުން ކާހާ ބިލިއަން ރުފިޔާ ނުފެންނާނެ، އެ ނުލިބޭތީ ހަޅޭއްލަވަނީ..