ހިޔާ ފްލެޓު ލިބުނު މީހުންނަށް ސަރުކާރުން ސަބްސިޑީއެއް ދޭން ގޮވައިލައިފި
ކުރީގެ ރައީސް ، ރައީސް އަބްދުﷲ ޔާމީންގެ ސަރުކާރުގައި ތަރައްގީކުރި ހިޔާ މަޝްރޫއިން ފްލެޓު ލިބުނު ފަރާތްތަކަށް ސަރުކާރުން ހާއްސަ ސަބްސިޑީއެއް ދޭން ޖެހޭކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ) ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހިޔާ މަޝްރޫއަކީ ޖަރީމާއެއްކަމަށް ވިދާޅުވެ މާފަންނު ހުޅަނގު ދާއިރާގެ މެމްބަރު މުހައްމަދު ފަލާހު ވަނީ މައްސަލައެއް ހުށަހަޅައިފައެވެ. އެމައްސަލައިގައި ވާހަކަދައްކަވަމުން ޝަރީފު ވިދާޅުވީ މުޅި ރާއްޖޭގެ ރައްޔިތުންނަށް ވެސް އަގުހެޔޮ ސޯޝަލް ހައުސިން ލިބުމަކީ އަސާސީ ހައްގެއް ކަމަށެވެ. އެހެން ނަމަވެސް ގައުމަކަށް ކަންކަން ކޮށްދެވޭނީ ކެރި ފޯރުންތެރިކަން ހުރި މިންވަރަކުން ކަމަށާއި އާމްދަނީ ވަށާ ޖެހޭ ނިޒާމެއް އިގްތިސޯދުގައި ބައްޓަން ކުރެވިގެން ކަމަށް ޝަރީފު ވިދާޅުވިއެވެ.
"އަޅުގަނޑުމެންގެ ރާއްޖޭގެ މާލެ ސަރަހައްދު ފިޔަވައި ވެސް މުޅި ރާއްޖޭގައި ވެސް ޒުވާނުންނަށް ބޯހިޔާވަހިކަން ލިބުން މިހާރު ދަނީ އެއްދުވަހުން އަނެއް ދުވަހަށް ހަނިވަމުން. ތަކެތީގެ އަގު ބޮޑުވެ ސޯޝަލް ހައުސިންގެ ވަށާ ޖެހޭ ގޮތަކަށް އޮތް ސިޔާސަތެއް އަޅުގަނޑުމެން އެބަ ކަނޑައަޅަން ޖެހޭ" ޝަރީފު ވިދާޅުވިއެވެ.
ޝަރީފު ވިދާޅުވީ ސޯޝަލް ހައުސިންއަށް ބޭނުންވާ ފައިނޭންސް ހޯދާނެ ގޮތްތަކެއް ހޯދަން ޖެހިފައިވާ ކަމަށެވެ. އަދި ސޯޝަލް ހައުސިން ލިބޭ ފަރާތްތަކުން އެ އާމްދަނީ ރިސައިކަލް ކޮށްގެން އިތުރު ރައްޔިތުންނަށް އެ މަގު ފަހިވާނެ ގޮތަކަށް ސިޔާސަތުތައް އެކަށައަޅަން ޖެހޭ ކަމަށް މެމްބަރު ވިދާޅުވިއެވެ.
ސޯޝަލް ހައުސިންއާއި ލަގްޝަރީ ހައުސިންއާ މިއީ ތަފާތު ދެ ސެކްޓާއެއްކަން ފާހަގަކުރައްވައި ޝަރީފު ވިދާޅުވީ ސޯޝަލް ހައުސިންއަކީ ކުޑަ އާމްދަނީއެއް ލިބޭ ފަރާތްތަކަށް އެމީހުންގެ އާމްދަނީގެ ވަކި މިންވަރެއް ހަރަދުކުރަން ޖެހޭ ގޮތަށް ދައުލަތުން ފޯރުކޮށްދޭން ޖެހޭ ހާއްސަ ފުރުސަތެއް ކަމަށެވެ. ޝަރީފު ވިދާޅުވީ އެހެން ގައުމުތަކުގައި ވެސް ސޯޝަލް ހައުސިން ފޯރުކޮށްދެނީ އާއިލާގެ އާމްދަނީގެ 30 އިންސައްތައިގެ ތެރޭގައިކަމަށެވެ.
"އެހެންވީމަ އަޅުގަނޑުމެން ކުރިއަށް އޮތްތަނުގައި އާމްދަނީ ވެހިކުރުމަށް ފަހު އެއަށް ބަލައިގެން އެ އާމްދަނީ ކުޑަކޮށް ލިބޭ ފަރާތްތަކަށް ޓާގެޓު ސަބްސިޑީއެއް ދޭންޖެހޭ ގޮތަށް މި އިއްޒަތްތެރި މަޖިލީހުން ބަޖެޓު އެކުލަވައިލާއިރު ޕްރޮވިޝަނެއް ހެދުމަކީ ވެސް މުހިންމުކަމެއް" ޝަރީފު ވިދާޅުވިއެވެ.
ޝަރީފު ވިދާޅުވީ ރައްޔިތުންގެ ތެރޭގައި ޝަކުވާ ބޮޑުވެގެން މިއުޅެނީ އެމީހުންނަށް އެފޯޑު ކުރެވޭ މިންވަރަށް ވުރެ ބޮޑު އެއްޗެއް ސޯޝަލް ހައުސިންއަށް ދައްކަން ޖެހުމުން ކަމަށެވެ. އެކަން ހައްލުކުރެވޭނީ "އެކްރޮސް ދަ ބޯޑު" އެ ދޭ އަދަދު ކުޑަކޮށްގެން ނޫން ކަމަށާއި އެހެން ނަމަވެސް ރައްޔިތުންގެ ތެރެއިން އެކަން އެފޯޑު ނުކުރެވެނީ ކޮންކޮން ބައެއްތޯ ބަލައި ދިރާސާކޮށް އެމީހުންނަށް އެކަށީގެންވާ ސަބްސިޑީއެއް ދީގެންކަމަށް މެމްބަރު ޝަރީފު ވިދާޅުވިއެވެ.
އާސަންދައިގެ ދަށުން ހިލޭ ބޭސްފަރުވާ ފޯރުކޮށްދިނުމުގެ ނިޒާމަށް އިޝާރާތް ކުރައްވައި ޝަރީފު ވިދާޅުވީ ފޯރުންތެރިކަން ހުރި މީހުންނަށް އެފަދަ އެހީތައް ފޯރުކޮށްދިނުމުގެ ބަދަލުގައި ބޭނުން ޖެހިފައިވާ މީހުންނަށް ޓާގެޓު ސަބްސިޑީ ފޯރުކޮށްދިނުމަކީ މުހިންމު ކަމެއްކަމަށެވެ.
"ސޯޝަލް ހައުސިންގެ މައްސަލައިގައި ވެސް ތިވިދާޅުވާ ކޮތަރު ކޮއްޓަށް ވެސް އެ އާމްދަނީ ނުލިބޭ ފަރާތްތަކަށް ދައުލަތުން އެބޭފުޅުންގެ އާމްދަނީއަށް ނިސްބަތްކޮށްފައި ކޮންމެ ވެސް ޓާގެޓް ސަބްސިޑީއެއް ދޭން އަންނަ އަހަރުގެ ބަޖެޓުގައި ހިމަނައިގެން ދިނީމަ މިހާރު ރައްޔިތުންގެ މިހިނގާ ޝަކުވާ ހުއްޓޭނެ" ޝަރީފު ވިދާޅުވިއެވެ.
ޝަރީފު ވިދާޅުވީ ސަބްސިޑީއެއް ދީގެން މެނުވީ ހުރިހާ ރައްޔިތުންނަށް އިންސާފުވެރިކަމާ އެކު ސޯޝަލް ހައުސިންގ ފޯރުކޮށް ނުދެވޭނެ ކަމަށެވެ. މާލޭގެ އިތުރުން އަތޮޅުތަކުގައި ވެސް މިނިޒާމު ގާއިމް ކުރަން ޖެހޭ ކަމަށް ޝަރީފު ވިދާޅުވިއެވެ.
ހިޔާ މަޝްރޫއުގެ ދަށުން ދެކޮޓަރީގެ ފްލެޓު ލިބޭ ފަރާތްތަކަށް ކުރީގެ ސަރުކާރުން ކަނޑައެޅީ 5200 ރުފިޔާގެ ކުއްޔެއް ދައްކާށެވެ. އެހެން ނަމަވެސް މިސަރުކާރުން ވަނީ އެއަގުގައި ފްލެޓުތައް ދެވެން ނެތްކަމަށް ބުނެ ކުލި 8000 ރުފިޔާއަށް ބޮޑުކޮށްފައެވެ. މިކަމުގެ ސަބަބުން އެ ތަންތަން ލިބުނު ގިނަ ބައެއްގެ ޝަކުވާ ވަނީ ގިނަވެފައެވެ.
ފުލެޓް ލިބުނު މީހުނަށްވުރެ ފުލެޓަށް އެދި ފުލެޓް ނުލިބި ބިކަވެފައި ތިބި މީހުނަށް އިނާޔަތެއް ދިނުން މާއައުލާކަމަން ބޮޑުކަމަށް ދެކެން.