ބަޖެޓް ބަހުސް އަންނަ މަހު 8ގައި
އަންނަ އަހަރަށް ދައުލަތުން ލަފާކޮށް މިއަދު މަޖިލީހަށް ހުށަހެޅި ބަޖެޓުގެ ބަހުސް މަރުހަލާ އަންނަ މަހުގެ 8ވަނަ ދުވަހު ފެށުމަށް ތާވަލުކޮށްފިއެވެ.
ބަޖެޓުގެ ކޮމިޓީ މަރުހަލާގެ މަސައްކަތް މިއަދު ފަށަން ވަނީ ހަމަޖެހިފައެވެ. ކޮމެޓީން ބަޖެޓް ދިރާސާކޮށް، އަންނަ މަހުގެ 18 ވަނަ ދުވަހު ތަޅުމަށް ހުށަހެޅުމަށް ވަނީ މުއްދަތު ކަނޑައަޅައިފައެވެ. އަދި ޑިސެމްބަރުގެ ކުރިން ބަޖެޓް މަޖިލީހުން ފާސް ކުރުމަށް ވަނީ ހަމަޖައްސާފައެވެ.
2022ވަނަ އަހަރަށް ދައުލަތުން ލަފާކުރާ ބަޖެޓް މަޖިލީހަށް ހުށަހެޅުއްވީ ފިނޭންސް މިނިސްޓަރ އިބްރާހީމް އަމީރެވެ. އަންނަ އަހަރަށް ހުށަހަޅާ ދައުލަތުގެ ބަޖެޓުގެ ޖުމްލައަކީ 36,925,424,524 ރުފިޔާއެވެ.
މި ބަޖެޓަކީ 9.7 ބިލިއަން ރުފިޔާއިން ޑެފިސިޓް ބަޖެޓެކެވެ. އަންނަ އަހަރު އާމްދަނީގެ ގޮތުގައި 24.3 ބިލިއަން ރުފިޔާ ލިބޭނެ ކަމަށް ލަފާކުރެއެވެ. އަދި15.4 ބިލިއަން ރުފިޔާއަކީ ޓެކުހުގެ އާމްދަނީއެވެ. ހިލޭ އެހީ އާއި އެހެނިހެން ގޮތްގޮތުން 2.9 ބިލިއަން ރުފިޔާ ލިބޭނެ ކަމަށް އަންދާޒާކޮށްފައިވެއެވެ.
އަންނަ އަހަރުގެ ބަޖެޓުގައި ޕީއެސްއައިޕީއަށް ނުވަތަ ތަރައްގީގެ މަޝްރޫއުތަކަށް ހަރަދުކުރުމަށް 6.3 ބިލިއަން ރުފިޔާ ވެސް ކަނޑައަޅައިފައިވެއެވެ. އަދި ދައުލަތުގެ ދަރަނި އަދާކުރުމަށް 2.9 ބިލިއަން ރުފިޔާ ހިމަނައިފައިވެއެވެ. މި ބަޖެޓު ފައިނޭންސް ކުރުމަށް ޖުމްލަ 13.4 ބިލިއަން ރުފިޔާ ހޯދަންޖެހޭނެ ކަމަށް ލަފާކޮށްފައިވެއެވެ.
