މޯލްޑިވިއަންއިން ނޯ-ޝޯ ފީއެއް ނަގަނީ
ޓިކެޓް ނެގުމަށް ފަހު ފުރަން ނައިސްފި ނަމަ ނުވަތަ ޓިކެޓް އެހެން ފްލައިޓަކަށް ބަދަލުކުރާ ނަމަ އިތުރު ފީއެއް ނަގަން ޤައުމީ އެއަރލައިން، މޯލްޑިވިއަންއިން ނިންމައިފިއެވެ.
މީގެ ކުރިން މޯލްޑިވިއަންއިން އަމަލު ކުރަމުން އަންނަ އުސޫލުގެ ދަށުން ޓިކެޓް ނެގުމަށް ފަހު ޕަސެންޖަރު ފުރަން ނުގޮސްފި ނަމަ އެހެން ފްލައިޓަކުން އިތުރު ފީއަކާ ނުލާ ޓިކެޓް ހަމަޖައްސައިދެއެވެ.
"ދެން"އަށް މައުލޫމާތު ދެއްވަމުން މޯލްޑިވިއަންގެ ޕަބްލިކް ރިލޭޝަންސް ކޮމިއުނިކޭޝަން މެނޭޖަރ މޫސާ ވަސީމް ވިދާޅުވީ، ޓިކެޓް ނެގުމަށް ފަހު ފްލައިޓް މިސްވެއްޖެ ނަމަ ނޯ ޝޯ ފީއެއް ނަގަން ނިންމައިފައިވާ ކަމަށާއި މިގޮތަށް ނިންމައިފައި ވަނީ ޕީކް ދުވަސްވަރާ ދިމާކޮށް ވީހާ ވެސް ގިނަ ބަޔަކަށް ދަތުރު ކުރުމުގެ ފުރުސަތު ދިނުމަށް ކަމަށެވެ.
"މިހާރު މިއޮންނަ ގޮތުން ވަރަށް ގިނަ ބަޔަކު ޓިކެޓް ނަގައިފަ ޝޯ އަޕް ނުވޭ ފްލައިޓަށް. އެންމެ ޕީކް ދުވަސްކޮޅު ވީމަ ވީހާވެސް ގިނަ ބަޔަކަށް ފުރުސަތު ދޭން ވެގެން، ނޯ ޝޯ މަދުކުރަން ވެގެން ގެނައި ބަދަލެއް މިއީ" މޫސަ ވިދާޅުވިއެވެ.
މޫސަ ވިދާޅުވީ، މިދިޔަ ހަތް މަސް ދުވަހަށް ބަލާއިރު، ޖުމްލަ 16،500 މީހުން ޓިކެޓް ނެގުމަށް ފަހު ފްލައިޓް ގަޑިއަށް ނާންނަ ކަމަށާއި މިގޮތަށް ކަންތައް ވުމުން ފުރަން ބޭނުންވެފައި ތިބޭ މީހުންނަށް އެ ފުރުސަތު ހަނިވާ ކަމަށެވެ. އަދި މަހެއްގެ މައްޗަށް އެވްރެޖްކޮށް މި ނަންބަރު އުޅެނީ 2،300ގައި ކަމަށާއި ޕީކް ދުވަސްވަރު އަންނާތީ، ގިނަ ބަޔަކަށް ފުރުސަތު ދޭން ނޯ ޝޯ ފީއެއް ނެގުމަށް ނިންމައިފައިވާ ކަމަށް ވެސް މޫސަ ވިދާޅުވިއެވެ.
ނޯ ޝޯ ފީއެއްގެ ގޮތުގައި، މޯލްޑިވިއަންއިން 80 ރުފިއާއާއި 200 ރުފިޔާއާ ދެމެދުގެ ފީއެއް ނެގުމަށް މޯލްޑިވިއަންއިން ވަނީ ނިންމައިފައެވެ. އަދި ފްލައިޓް ގަޑި އެހެން ފްލައިޓަކަށް ބަދަލުކުރާ ނަމަ ރީއިޝޫ ފީއެއް ވެސް ނެގުމަށް ވަނީ ނިންމައިފައެވެ.
ފުލައިޓް ޑިލޭ ފީ އެއް ފަސިންޖަރުންނަށް ދިނުން މާ ރަނގަޅެއްނު.
ޥަރަށް ރަނގަޅު ކަމެއްތީ، ނާދެވޭނެކަން ކުރިން ނާންގާ ނާތުވެއްޖެނަމަ އެއްމަސް ދުވަހަށް އެމީހަކު މޯލްޑިވިއަން ދަތުރުތަކުން ސަސްޕެންޑް ކުރޭ، ގަޑިއަށް ފުރަން ކުރިން އަންނަމީހުންގެ ހައްގުތައް މިމީހުންގެ ސަބަބުން ގެއްލެނީ ޑިލޭވެގެން، ދެންނޫހުން ތަންކޮޅެއް އޮއްޓަރުހުރި އުފެއްދުންތެރި ހަބަރުލިޔަން އުޅެބަލަ