ކޮވިޑް-19އާ އެކު ދުނިޔެ 2 އަހަރު؛ 5 މިލިއަން މީހުން މަރުވެއްޖެ
2019ވަނަ އަހަރު ދުނިޔޭގެ ހަތަރު ބިތަށް ފެތުރިގެން ދިޔަ ކޮވިޑް-19ގެ ބަލިމަޑުކަމުގައި މުޅި ދުނިޔެއިން 5 މިލިއަން މީހުން މަރުވެއްޖެއެވެ.
ދުނިޔޭގެ އެންމެ ފަގީރު ގައުމުތަކުން ފެށިގެން ގޮސް އެންމެ މުއްސަނދި ގައުމުތަކުގެ ގިނަ އަދަދެއްގެ މީހުން ކޮވިޑް-19ގައި ވަނީ މަރުވެފައެވެ. މިގޮތުން ދުނިޔޭގެ އެންމެ ތަރައްގީވެފައިވާ އެއް ގައުމު ކަމުގައިވާ އެމެރިކާއިން އެކަނި ވެސް ކޮވިޑް-19 ޖެހިގެން މަރުވި މީހުންގެ އަދަދު 740,000 އަށް ވުރެ ގިނައެވެ.
"އަހަރުމެންގެ އަމިއްލަ ނަފްސު ހިމާޔަތް ކުރަން އެބަޖެހޭ. އިތުރު 5 މިލިއަން މީހުން އަދިވެސް މިބަލީގައި މަރުވުމުގެ ފުރުސަތު އެބައޮތް" ޔާލެ ސުކޫލު އޮފް ޕަބްލިކް ހެލްތުގެ ޑޮކްޓަރ އަލްބާރޓް ކޯ ވިދާޅުވިއެވެ.
ކޮވިޑް-19އިން ރައްކާތެރިވުމަށް ވެކްސިން ޖެހުމުގެ ޕްރޮގްރާމްތައް ހިނގަމުންދާއިރު އެފްރިކާ ހިމެނެނީ އާބާދީގެ ނިސްބަތުން އެންމެ ކުޑައިންސައްތައަކަށް ވެކްސިން ޖެހުނު ސަރަހައްދުގެ ގޮތުގައެވެ. މިގޮތުން އެފްރިކާގެ މުޅި އާބާދީން ވެކްސިން ޖެހިފައި ވަނީ އެންމެ 5 އިންސައްތަ މީހުންނަށެވެ.
ކޮވިޑް ޖެހިގެން މަރުވި މީހުންގެ ޖުމްލަ 4 މިލިއަނަށް އެރިކަން އިއުލާނުކުރިތާ ދެމަސް ދުވަސް ފަހުން 5 ބިލިއަން މީހުން ކޮވިޑްގައި މަރުވިކަން އިއުލާނު ކުރުމަކީ ބަލީގެ ނުރައްކާ ކުޑަ ނުވާކަން ދައްކައިދޭ ހެއްކެއްކަމަށް ކަމާ ބެހޭ މާހިރުން ދަނީ ބުނަމުންނެވެ. މީގެން ދައްކައިދެނީ ކޮވިޑް ބަލީގައި ދެމަސް ދުވަހުގެ ތެރޭގައި 1 ބިލިއަން މީހުން މަރުވެފައިވާ ކަމަށާއި އަދި ފަގީރު ގައުމުތަކުގައި ބަލީގެ ރިކޯޑްތައް ފުރިހަމައަށް ނުކުރާތީ ބަލީގެ ސީދާ އަދަދުތަައް ނޭނގޭ ކަމަށް ކަމާ ބެހޭ މާހިރުން ބުނެއެވެ.
