ކުރިއަށް އޮތް 3 އަހަރު 1.5 ބިލިއަނެއްހާ ރުފިޔާ އަތޮޅުތަކުގެ ގެދޮރުވެރިކަމަށް!
ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ ބޮޑެތި މަޝްރޫޢުތަކެއް 2022ވަނަ އަހަރު މާލެއާއި އަތޮޅުތަކުގައި ކުރިއަށްދާނެ ކަމަށާއި ކުރިއަށް އޮތް 3 އަހަރު އަތޮޅުތަކުގެ ގެދޮރުވެރިކަމަށް 1.5 ބިލިއަނެއްހައި ރުފިޔާ ހިމަނައިފައި ވާނެކަމަށް ފިނޭންސް މިނިސްޓްރީން ވިދާޅުވެއްޖެއެވެ.
ފިނޭންސް މިނިސްޓްރީން ކުރެއްވި ޓްވީޓެއްގައި ވިދާޅުވީ މި މަަޝްރޫޢުތަކަށް 2022ގެ ބަޖެޓުން ޖާގަ ދީފައިވާ ކަމަށެވެ.
ފިނޭންސް މިނިސްޓްްރީން ވިދާޅުވީ ފަހި ދިރިއުޅުން ކޯޕަރޭޝަން ލިމިޓެޑް މެދުވެރިކޮށް މާލޭ ސަރަހައްދުގައި ގާއިމްކުރާ 4000 ހައުސިން ޔުނިޓާއި އަމިއްލަ ފަރާތްތަކާއި އެހެނިހެން ގޮތްގޮތުން މާލޭ ސަރަހައްދުގައި ގާއިމު ކުރާ ހައުސިން ޔުނިޓުތަކުގެ ޖުމްލަ 11،000އަށް އަރާނެކަމަށެވެ.
ސަރުކާރުން މިހާތަނަށް ހިންގި ބޯހިިިޔާވަހިކަމުގެ އެންމެ ބިޔަ މަޝްރޫއުކަމުގައިވާ ހިޔާ މަޝްރޫއުގެ ދަށުން ހުޅުމާލޭ ފޭސް 2ގައި ރައީސް ޔާމީންގެ ސަރުކާރުން އިމާރާތް ކުރި ފުލެޓްތަކުގައި މިހާރު ވަނީ މީހުން ދިރިއުޅެން ފަށައިފައެވެ.
މީގެ އިތުރުން ރައީސުލްޖުމްހޫރިއްޔާ ދާދިފަހުން ކުޅުދުއްފުށީ ސިޓީއަށް ކުރެއްވި ދަތުރުފުޅެއްގައި ވިދާޅުވީ 2022ވަނަ އަހަރުގެ ބަޖެޓުން ކުޅުދުއްފުއްޓަށް 400 ހައުސިން ޔުނިޓް ރިޒާރވް ކޮށްފައިވާ ކަމަށެވެ. މީގެ އިތުރުން ބޭރުގެ ފަރާތްތަކުން ކުޅުދުއްފުށީގައި 1000 ހައުސިން ޔުނިޓު އެޅުމުގެ އަގުގެ މަޝްވަރާތައް ނިމުމަކާ ހިސާބަށް އައިސްފައިވާކަމަށް ވެސް ރައީސުލް ޖުމްހޫރިއްޔާ ވަނީ ވިދާޅުވެފައެވެ.
