މައްސަލަ ހައްލު ވަންދެން ލޭގެ ޓެސްޓު ހަދަން ދޫކުރާނީ 300 ނަންބަރު: އައިޖީއެމްއެޗް
ލެބޯޓަރީގެ މެޝިންތަކަކަށް ދިމާވި މައްސަލަ ހައްލު ވަންދެން މާދަމާއިން ފެށިގެން އިންދިރާ ގާންދީ މެމޯރިއަލް ހޮސްޕިޓަލުން އައުޓް ޕޭޝަޓުންގެ ލޭގެ ޓެސްޓު ހެދުމަށް ދޫކުރާނީ ދުވާލަކު 300 ނަންބަރު ކަމަށް އެ ހޮސްޕިޓަލުން ވިދާޅުވެއްޖެއެވެ.
އައިޖީއެމް ހޮސްޕިޓަލުން ވިދާޅުވީ މާދަމާ ހެނދުނު 8އިން ފެށިގެން ދޫކުރާނީ 300 ނަންބަރު ކަމަށާއި ކިއުބީ މެދުވެރިކޮށް ނަންބަރު ނެގޭނީ ހޮސްޕިޓަލަށް ގޮސްގެން ކަމަށެވެ.
08 ނޮވެމްބަރުގައި އައިޖީއެމްއެޗް ލެބޯރޓަރީއިން ދެމުންދާ އައުޓްޕްޝަންޓް ލޭގެ ޓެސްޓު ހަދަން ބޭނުންކުރާ އެލިނިޓީ ސީއެލްގެ މެޝިންތަކަށް ޓެކްނިކަލް މައްސަލައެއް ދިމާވުމާ ގުޅިގެން ޓެސްޓުތައް ހެދުން ވަނީ ވަގުތީ ގޮތުން މެދުކަނޑައިލެވިފައެވެ. އަދި މިމައްސަލަ އަދިވެސް އެއްކޮށް ހައްލުވެފައި ނުވާކަމަށް އެހޮސްޕިޓަލުން ވިދާޅުވިއެވެ. މި އާއެކު އޭޑީކޭ ހޮސްޕިޓަލުގެ ލެބޯޓަރީއަށް ބާރު ބޮޑުވެފައިވާކަމަށް އެ ހޮސްޕިޓަލުން ވަނީ ވިދާޅުވެފައެވެ.
މި މައްސަލަ މުޅިން ހައްލުވެ، މެޝިންތަކުގެ ފުލް ކެޕޭސިޓިގައި ބޭނުންކުރެވެން ފެށުމުން، ކުރިއެކޭ އެއްފަދައިން އައުޓްޕޭޝަންޓް ލޭގެ ޓެސްޓުތައް ހެދުމަށް ނަންބަރު ނަންގަވާ ހުރިހާ ބޭފުޅުންނަށް ޚިދުމަތްދޭން ފަށާނެ ކަމަށް ވެސް އައިޖީއެމްއެޗްއިން ވިދާޅުވިއެވެ. އަދި މީގެ އިތުރުން މި ޓެސްޓުތައް، ވިނަވި ޚިދުމަތް ފޯރުކޮށްދޭ އެހެން ކޮންމެ ލެބޯޓްރީއަކުން ހެދުމުގެ ފުރުސަތު އޮތްކަމަށް ވެސް އައިޖީއެމްއެޗް ވަނީ ވިދާޅުވެފައެވެ.
