ކަސްޓަމްސްގެ ބެލުމުގެ ދަށުގައި ހުރި ގިނަ އަދަދެއްގެ މަސްތުވާތަކެތި ނައްތައިލައިފި
ކަސްޓަމްސްގެ ބެލުމުގެ ދަށުގައި ހުރި ގިނަ ބާވަތްތަކެއްގެ ތަކެތި ނައްތައިލައިފިއެވެ.
ކަސްޓަމްސްއިން ބުނީ އެ ތަކެއްޗަކީ ކަސްޓަމްސްގެ އާންމު ޤަވާއިދުގެ 422ވަނަ މާއްދާގެ ދަށުން, ކަސްޓަމްސްގެ ކޮންޓްރޯލްގެ ދަށުގައި ނުގެންގޮސް ހުންނަ ތަކެއްޗާއި، ރާއްޖެއަށް އެތެރެކުރަން އުޅެނިކޮށް ހިފެހެއްޓޭ މަނާތަކެތި ކަސްޓަމްސްއިން ނައްތައިލުމުގައި ޢަމަލުކުރާ އުޞޫލުގެ ދަށުން ނައްތާލެވުނު ތަކެތި ކަމަށެވެ.
ކަސްޓަމްސް އިން ނައްތައިލައިފައިވަ ނީ 4142 ފުޅި ބަނގުރާ، 717 ދަޅު ބިޔަރު، 31750 ސްޓިކް ބިޑި/ސިނގިރޭޓް، ބިޔަރާއި ބަނގުރާ ހުސްކުރި 523 ދަޅު އަދި 7.3 ކިލޯ ގްރާމުގެ ދުންފަތެވެ. މީގެ އިތުރުން ޖުވާ ކުޅޭ ސާމާނާއި ބުދު ފަދަ ތަކެތީގެ 173 އައިޓަމްސް ވެސް ނައްތައިލައިފައިވާ ކަަމަށް ކަސްޓަމްސް އިން ބުނެއެވެ.
ކަސްޓަމްސް އިން ބުނީ އެކިއެކި ސަބަބުތަކާ ހުރެ ކަސްޓަމްސްގައި ހިފެހެއްޓިފައި ހުންނަ ތަކެތި ކަނޑައެޅިފައިވާ އުޞޫލުގެ ދަށުން ނައްތާލެވިދާނެކަމަށް ކަސްޓަމްސްގެ ޢާންމު ގަވާއިދުގައި ބަޔާންކުރެވިފައިވާ ކަމަށެވެ.
