ކުރިން ވިސާ ނުހައްދައި ދިވެހިންނަށް މިހާރު ތަޒަކިސްތާނަށް ދެވޭނެ
ކުރިން ވިސާ ނުހައްދައި ދިވެހިންނަށް ތަޒަކިސްތާނަށް ދަތުރުކުރެވޭ ގޮތް ހަމަޖައްސައިފިއެވެ.
މިކަން އިއުލާނު ކުރައްވާ ރާއްޖޭގެ ފޮރިން މިނިސްޓަރ އަދި އދ.ގެ ޖެނެރަލް އެސެންބްލީ 76 ވަނަ ސެޝަންގެ ރައީސް އަބްދުﷲ ޝާހިދު ވިދާޅުވީ މިކަމަށް ޓަކައި ތަޒަކިސްތާނުގެ ފޮރިން މިނިސްޓަރއަށް ޝުކުރު އަދާކުރައްވައިފައެވެ.
"ކުރިއަށް ވިސާ ހެއްދުމަކާ ނުލާއި ތަޒަކިސްތާނަށް ދިއުމުގެ ފުރުސަތު ފަހިކޮށްދެއްވީތީ ފޮރިން މިނިސްޓަރ ސިރާޖުއްދީން މުހްރިއްދީން އަދި ތަޒަކިސްތާނުގެ ސަރުކާރަށް ޝުކުރުއަދާ ކުރަން" ކުރިން ވިސާ ހެއްދުމަކާ ނުލައި ދިވެހިންނަށް ތަޒަކިސްތާނަށް ދެވޭނެކަން އިއުލާނު ކުރައްވައި ކުރެއްވި ޓްވީޓެއްގައި ޝާހިދު ވިދާޅުވިއެވެ.
ކުރިން ވިސާ ނެގުމަކާ ނުލައި ދިވެހިންނަށް ތަޖިކިސްތާނަށް ދަތުރުކުރެވޭނީ 2022 ޖެނުއަރީ 1އިން ފެށިގެންނެވެ.
2018 ނޮވެމްބަރުން ފެށިގެން މިހާތަނަށް ރަޝިޔާ، މޮރޮކޯ، ތައިލެންޑް އަދި ޔުނައިޓެޑް އަރަބް އެމިރޭޓްސްއަށް ކުރިން ވިސާ ނެގުމަކާ ނުލައި ދިވެހިންނަށް ދަތުރުކުރެވޭނެ އިންތިޒާމް ހަމަޖެހިފައިވާކަން ފާހަގަ ކުރެވެއެވެ.
އަދި މީގެ އިތުރުން ވެސް ގައުމުތަކަށް ދަތުރު ކުރުމުގައި ދިވެހިންނަށް ލުއިދެމުން ދާކަން ފާހަގަ ކުރެވެއެވެ.
Ads by STO
