"ސާތިޔާ" ކުޅެން ރާނީ އެއްބަސް ކުރުވީ މަންމައާއި ބައްޕަ ކޮޓަރިއަކަށް ލައި ހައްޔަރު ކޮށްގެން!
ބޮލީވުޑްގެ "ބަބްލީ"ގެ ނަމުން މަޝްހޫރު ރާނީ މުކަރުޖީގެ ބޮލީވުޑް ހަޔާތް ފަށައިފައި ވަނީ ފިލްމް "ރާޖާ ކީ އާއެގީ ބަރާތުއިންނެވެ. "ވީރް ޒާރާ"، "ޗަލްތޭ ޗަލްތޭ" ފަދަ ކާމިޔާބު އެތައް ފިލުމެއް އޭނާ ވަނީ ބެލުންތެރިންނާ ހަމައަށް ގެނެސްދީފައެވެ.
ރާނީގެ ކާމިޔާބު ފިލްމުތަކުގެ ތެރެއިން ވެސް "ސާތިޔާ"އަކީ ފާހަގަކޮށްލެވޭ ފިލްމެކެވެ. އެހެން ނަމަވެސް އެފިލްމު ކުޅެން ރާނީ އެއްބަސްވެފައި ވަނީ އޭނާއަށް މަޖުބޫރުވެގެންނެވެ. އެފިލްމުގެ ޑައިރެކްޓަރ ޔަޝް ޗޯޕްޅާ، ރާނީގެ މައިންބަފައިން ކޮޓަރިއަކަށް ލައި ހައްޔަރު ކުރުމުން ރާނީއަށް މަޖުބޫރުވީ ފިލްމު ކުޅެން އެއްބަސްވާން ކަމަށް ރާނީ ވަނީ ބުނެފައެވެ.
އިންޑިޔާގެ ނޫހަކަށް ދިން އިންޓަރވިއުއެއްގައި ރާނީ ބުނިގޮތުގައި ރާނީގެ މަންމައާއި ބައްޕަ ޔަޝް ޗޯޕްޅާ ގާތަށް ދިޔައީ ރާނީ ފިލްމު "ސާތިޔާ" ކުޅެން ބޭނުން ނުވާ ވާހަކަ ބުނާށެވެ.
"ދެން އޭނާ އަހަންނަށް ގުޅައިފައި ބުނަނީ ދަރިފުޅާއޭ ފިލްމަށް ނޫނެކޭ ބުނެގެން ތި ހަދަނީ ވަރަށް ބޮޑު ގޯހެކޭ. އަހަރެންގެ ކޮޓަރީގެ ދޮރު މި ތަޅުލަނީއޭ މަންމައާއި ބައްޕައާ އެކު. ފިލްމު ކުޅެން އެއްބަސް ނުވަނީސް އެމީހުންނަކަށް ނުނިކުމެވޭނެއޭ. އެކަމަކު މިހާރު ޝުކުރު ކުރަން އެގޮތަށް ވެސް އެފިލްމް ކުޅެން އެއްބަސް ކުރުވީމައި" ރާނީ ބުންޏެވެ.
ފިލްމް "ސާތިޔާ" ގައި ރާނީއާ އެކު ފެނިގެން ގޮސްފައި ވަނީ ވިވެކް އޯބްރޯއީއެވެ.
