11 އަހަރުވީ ލޯބީގެ ގުޅުމަށް ފަހު ރާޖްކުމާރް ރާއޯ ކައިވެނިކޮށްފި
ބޮލީވުޑްގައި މިހާރު އަރަމުން އަންނަ ތަރި ރާޖްކުމާރް ރާއޯ، އޭނާގެ 11 އަހަރުވީ ލޯބީގެ ގުޅުމުގެ ބައިވެރިޔާ ޕަތުރަލިކާއާ ކައިވެނި ކޮށްފިއެވެ.
ކައިވެނި ކުރުމަށް ފަހު ރާޖްކުމާރް ރާއޯ ވަނީ އޭނާގެ އަންހެނުންނާ އެކު އިއްޔެ ނަގާފައި ހުރި ކައިވެނީގެ ބައެއް ފޮޓޯތައް ވެސް މީސް މީޑިއާގައި ހިއްސާ ކޮށްފައެވެ.
ރާޖްކުމާރް ރާއޯ ހިއްސާ ކުރި އެ ޕޯސްޓުގައި ބުނެފައި ވަނީ، ޕަތުރަލިކާއަކީ އޭނާގެ ލޯބިވެރިޔާގެ އިތުރުން އޭނަގެ އެންމެ ގާތް އެކުވެރިޔާ ކަމަށެވެ. އެހެންކަމުން 11 އަހަރަށް ފަހު، ޕަތުރަލިކާގެ ފިރިމީހާގެ ލަގަބު މިހާރު ލިބުމަކީ އޭނާއަށް ލިބުނު ވަރަށް ބޮޑު އުފަލެއް ކަމަށް ވެސް ރާޖަކުމާރް ރާއޯ ބުނެފައިވެއެވެ.
ޕަތުރަލިކާ ވެސް ރާޖްކުމާރް ރާއޯއާ ބެހޭގޮތުން ބުނެފައި ވަނީ، ބެސްޓް ފްރެންޑާ ކައިވެނި ކުރެވުމަކީ އޭނާއަށް ލިބުނު ވަރަށް ބޮޑު އުފަލެއް ކަމަށެވެ.
ރާޖްކުމާރް ރާއޯ އޭނާގެ ލޯބިވެރިޔާއާ އެންގޭންޖު ކުރީ މިދިޔަ މަހުގައެވެ. ރިޕޯޓުތަކުން ބުނާ ގޮތުގައި އެ ދުވަހު އެ ދެމީހުން ވެސް ވަނީ އެއް ކަކޫ މައްޗަށް ތިރިވެ އެކަކު އަނެކަކު ކައިރީ އިންނަން އަހައިފައެވެ.
