ރާޖް ކުމާރުގެ ކައިވެނި: ބޮލީވުޑްގެ ފިލްމް މޭކަރުންގެ "ރީޔޫނިއަން"އަކަށް!
ބޮލީވުޑްގެ ކާމިޔާބު ބަތަލް ، ރާޖް ކުމާރް ރާއޯގެ ކައިވެނީގެ ހަފްލާގައި ގިނަ އަދަދެއް ފަންނާނުން ފެނިގެން ދިޔައިރު ހަފްލާގެ އެންމެ ހާއްސަ ކަމަކަށްވީ ބޮލީވުޑްގެ ކާމިޔާބު ގިނަ ފިލްމް މޭކަރުން މި ހަފްލާގައި ބައިވެރިވެ މަޖާ ވަގުތުތަކެއް އެކުގައި ހޭދަކޮށްފައި ވުމެވެ.
މި ކައިވެނީގެ ހަފްލާގައި ނަގައިފައިވާ ފޮޓޯތަކާއި ވީޑިއޯތައް މިހާރު ސެލެބްރިޓީން ޝޯޝަލް މީޑިޔާއަށް ދޫކުރަމުން ދާއިރު އެންމެ ގިނަ މީހުން އަޅައިގަނެފައި ވަނީ ފަރާ ހާން، ރާޖް ކުމާރު ކައިވެނީގެ ހަފްލާއަށް ތައްޔާރުކޮށްދެމުން ދިޔަ ފޮޓޯއެވެ. މިފޮޓޯގައި ފަރާ ހުރީ ރާޖް ކުމާރުގެ ބޮލުގައި ފަގުޑި އަޅައިދޭށެވެ.
ފަރާހާންގެ އިތުރުން ހަންސެލް މެހެތާ، އަނޫބަވް ސިންހާ، އަނޫރާގް ބާސޫ، ރާޖް އަދި ޑީކޭ ވެސް މިހަފްލާގައި ބައިވެރި ފޮޓޯ ނަގައި އެހެން ފަންނާނުންނާ އެކު އުފާވެރި ވަގުތުތަކެއް ހޭދަކޮށްފައިވެއެވެ.
ރާޖް ކުމާރް ރާއޯއާއި ޕަޓްރަލެކާ ކައިވެނިކޮށްފައި ވަނީ މިމަހުގެ 15 ވަނަ ދުވަހު ދަ އޯބްރޯއި ސުކްވިލާސް ސްޕާ ރިޒޯޓްގައެވެ.
ކައިވެންޏަށް ފަހު ރާޖްކުމާރު ޝޯޝަލް މީޑިޔާގައި ހިއްސާކުރި މެސެޖެއްގައި ބުނެފައި ވަނީ ޕަތުރަލިކާއަކީ އޭނާގެ ލޯބިވެރިޔާގެ އިތުރުން އޭނަގެ އެންމެ ގާތް އެކުވެރިޔާ ކަމަށެވެ. އެހެންކަމުން 11 އަހަރަށް ފަހު، ޕަތުރަލިކާގެ ފިރިމީހާގެ ލަގަބު މިހާރު ލިބުމަކީ އޭނާއަށް ލިބުނު ވަރަށް ބޮޑު އުފަލެއް ކަމަށް ވެސް ރާޖަކުމާރް ރާއޯ ބުނެފައިވެއެވެ.
