އަރްޖުން މިފަހަރު ޗުއްޓީ ހޭދަ ކުރަނީ މަލައިކާ އެކު އެއް ނޫން
މިދުވަސްކޮޅަކީ ބޮލީވުޑްގެ އެކި ތަރިން އެމީހުންގެ ލޯބިވެރިންނާ އެކީ އޮންނަ ގުޅުން އިތުރަށް ބަދަހި ކުރަމުން އަންނަ ދުވަސްކޮޅެވެ.
އެއްބަޔަކު ކައިވެނި ކުރަމުން އަންނަ އިރު، އަނެއް ބަޔަކު އަންނަނީ އެމީހުންގެ ބައިވެރިންނާ އެކީ ޗުއްޓީއަށް އެކި ތަންތަނަށް ޒިޔާރަތް ކުރުމުގެ ދަތުރުތަށް ރާވަމުންނެވެ.
ނަމަވެސް މިފަދަ އެއްވެސް ކަމެއް މިފަހަރު ނުރާވާ އެއް ބަޔަކީ އަރަމުން އަންނަ ތަރި އަރްޖުން ކަޕޫރާއި އޭނަގެ ލޯބިވެރިޔާ މަލައިކާ އަރޯރާއެވެ.
މަލައިކާއާއި އަރްޖުން ލޯބީގެ ގޮތުން ގުޅިގެން އުޅޭތާ މިހާރު ވަރަށް ގިނަ އަހަރުތަކެއް ވެއްޖެއެވެ. މި ދެމީހުންގެ ގުޅުމުގެ ވާހަކަ މީގެ ކުރިން ސިއްރު ކުރި ނަމަވެސް، އެކަކު އަނެކަކާ އެކީގައި އުޅުން ފަހުން ސިއްރެއް ނުކުރެއެވެ. އެގޮތުން އެކީގައި އަތުގުޅުވައިލައިގެން އެކި ހަފްލާތަކާއި ޗުއްޓީ ހޭދަ ކުރަން ތަންތަނަށް ގޮސް އެކީގައި ހޭދަ ކުރާ ވަގުތުތަކުގެ ފޮޓޯތައް ހިއްސާ ކުރުން ވެސް ހިމެނެއެވެ.
ނަމަވެސް ކުރިއަށް މިއަންނަ ބޮޑު ޗުއްޓީގައި މަލައިކާއާއި އަރްޖުން އެކުގައި ނުފެންނާނެ ކަމަށް އެމީހުންގެ ގާތް މީހުން ބުނެފިއެވެ. ސަބަބަކީ ކުރިއަށް އޮތް ދުވަސްތަކުގައި އަރްޖުން އެކި މަސައްކަތްތަކުގައި ވަރަށް ބުރަކޮށް އުޅެން ޖެހުމެވެ. އެގޮތުން "އެކް ވިލަން ރިޓާންސް"އިން ވެސް އަރްޖުން ފެންނަ އިރު، އިތުރު ޕްރޮޖެކްޓުތަކެއް ވެސް އޭނާއަށް ވަނީ ލިބިފައެވެ. އެހެންކަމުން ކްރިސްމަސްއާއި އައު އަހަރުގެ ޗުއްޓީއަށް ވެސް އަރްޖުންގެ މަސައްކަތްތައް ނުނިމޭނެ ކަމަށް ރިޕޯޓުތަކުން ބުނެފައިވެއެވެ.
Ads by STO
