ބަޖެޓްގައި ރައީސް ޔާމީނަށް އެލަވެންސެއް ހިމަނައިފައެއް ނެތް
ރައީސްކަން ކުރެއްވި ބޭފުޅުންނަށް ޙައްޤުވާ އިނާޔަތް ރައީސް އަބްދުﷲ ޔާމީން އަބްދުލްޤައްޔޫމަށް މިއަންނަ އަހަރަށް ލަފާ ކުރާ ދައުލަތުގެ ބަޖެޓްގައި ހިމަނައިފައެއް ނުވެއެވެ.
ރައީސް ޔާމީންގެ މައްޗަށް ކްރިމިނަލް ކޯޓުން އިއްވި ހުކުމް، އިސްތިއުނާފީ އެންމެ މަތީ މަރުހަލާ ސްޕްރީމް ކޯޓުން މިއަދު ވަނީ ބާތިލްކޮށްފައެވެ.
ރައީސް ޔާމީން ވެރިކަމުން ފޭބުމާއެކު، އެހެން ރައީސުންނަށް ވެސް ދޭ ފަދައިން އިނާޔަތްތަކާއި ސެކިއުރިޓީ ވަނީ ދީފައެވެ. އެހެން ނަމަވެސް، ރައީސް ޔާމީންގެ މައްޗަށް 28 ނޮވެންބަރު 2019ވަނަ އަހަރު ކްރިމިނަލް ކޯޓުން ފަސް އަހަރުގެ ޖަލު ހުކުމެއް އިއްވުމާ އެކު، އިނާޔަތްތައް ދިނުންވަނީ ހުއްޓައިލައިފައެވެ. އެއީ ރައީސުލްޖުމްހޫރިއްޔާކަން ކޮށްފައިވާ މީހަކަށް ދޭން ޖެހޭ ރައްކާތެރިކަމާއި އިނާޔަތްތަކާ ބެހޭ ގާނޫނުގެ 10 ވަނަ މާއްދާގެ ދަށުންނެވެ.
މިއަންނަ އަހަރު، ރައީސް މައުމޫން، ރައީސް ނަޝީދު އަދި ރައީސް ވަޙީދަށް އިނާޔަތާއި ރައްކާތެރިކަން ކަށަވަރު ކުރުމަށް ބަޖެޓްގައި ވަނީ ހިމަނައިފައެވެ. މިގޮތުން ރައީސް މައުމޫނަށް މާލީ އިނާޔަތެއްގެ ގޮތުން މަހަކު 50،000 ރުފިޔާ ކަނޑައަޅާފައިވާއިރު، ރައީސް ނަޝީދާއި ރައީސް ވަޙީދަށް 50،000 ރުފިޔާގެ މާލީ އިނާޔަތެއް ދޭން ވަނީ ބަޖެޓްކޮށްފައެވެ. މީގެ އިތުރުން، އަދި އެ ތިން ބޭފުޅުންގެ އޮފީސް ހިންގުމުގެ ހަރަދުގެ ގޮތުގައި ކޮންމެ ބޭފުޅަކަށް 175،00 ރުފިޔާ ދޭން ވަނީ ހިމަނައިފައެވެ.
