މަނީ ލޯންޑަރިންގެ މައްސަލައަކާ ގުޅިގެން ޖެކްލިން ހައްޔަރު ކޮށްފާނެ ކަމުގެ ބިރު
މަނީ ލޯންޑަރިންގެ މައްސަލައަކާ ގުޅިގެން ބޮލީވުޑްގެ މަޝްހޫރު އެކްޓްރެސް ޖެކްލިން ފެނާންޑޭޒް ވެސް ޖަލަށް ލައިފާނެކަމުގެ އަޑުތަކެއް ފެތުރެމުން ފަށައިފިއެވެ.
މި މައްސަލައިގެ ތެރެއަށް ޖެކްލިންގެ ނަން އައިސްފައި މިވަނީ، މަކަރާ ހީލަތުން އެތައް ބައެއްގެ އަތުން ފައިސާއާއި މުދާ ފޭރިގަތް ސުކޭޝް ޗަންދްރަޝޭކަރްއާ އެކު ޖެކްލިން ހުއްޓައި ނަގައިފައިވާ ފޮޓޯއެއް ވައިރަލް ވުމަށް ފަހުގައެވެ.
ރިޕޯޓުތަކުން އިއްޔެ ބުނެފައިވާ ގޮތުގައި ސުކޭޝްގެ މައްސަލަ މިހާރު ބަލަމުންދާ އިރު، މަނީ ލޯންޑަރިންގެ މައްސަލައެއް ވެސް މިވަނީ ފެންމަތިވެފައެވެ. އެކަމާ ގުޅިގެން އެންފޯސްމަންޓް ޑައިރެކްޓޮރޭޓް (އީޑީ)އިން ވަރަށް އަވަހަށް ޖެކްލިން ހައްޔަރު ކޮށްފާނެ ކަމަށް ވެސް ރިޕޯޓުތަކުން ބުނެއެވެ.
ޝްރީ ލަންކާގެ ރައްޔިތެއް ކަމަށްވާ ޖެކްއަލިން މި މައްސަލައިގެ ތެރެއަށް ވަދެފައި މި ވަނީ 200 ކްރޯޑް ރުޕީސްގެ މަނީ ލޯންޑަރިންއެއް ސުކޭޝް ކޮށްފައިވާ އިރު، އޭގެން ޖެކްލިންއަށް ވެސް ފައިދާ ކޮށްފައިވާ ކަމަށް ބުނެއެވެ.
މި މައްސަލައާ ގުޅިގެން ފުލުހުން ވަނީ، ޖެކްލިން ޤައުމުން ބޭރަށް ފުރަން އުޅެނިކޮށް އެއާޕޯޓުން ހުއްޓުވައިފައެވެ.
ސުކޭޝްގެ މި ވޭދަނައާ ގުޅިގެން ޖެކްލިންގެ އިތުރުން މަޝްހޫރު ނެށުންތެރިޔާ ނޯރާ ފަތޭހީ ވެސް ވަނީ މައްސަލަގަނޑެއްގެ ތެރެއަށް ވެއްޓިފައެވެ. އެނގިފައިވާ ގޮތުގައި މި ދެ އެކްޓްރެސުންނަށް ވެސް ވަނީ ސުކޭޝްގެ ފަރާތުން އަގު ބޮޑު ހަދިޔާ ލިބިފައެވެ.
Ads by STO
