މުއިއްޒު މިއަދު އޭސީސީއަށް ހާޒިރުކުރަނީ
މާލޭގެ މޭޔަރު ޑރ. މުހައްމަދު މުއިއްޒު މިއަދު އެންޓި ކޮރަޕްޝަން ކޮމިޝަން (އޭސީސީ)އަށް ހާޒިރު ވާން އަންގައިފިއެވެ.
މުއިއްޒު ވިދާޅުވީ އޭސީސީއަށް ހާޒިރުވާން އެންގީ މިއަދު މެންދުރު ފަހު 2:00 ޖަހާއިރަށް ކަމަށެވެ. އަދި އޭސީސީއަށް ހާޒިރުވާން އެންގީ ބިރު ދެއްކުމުގެ ގޮތުން ކަމަށާއި އެކަމާ ޖެހިލުންވެވަޑައިނުގަންނަވާ ކަމަށް މުޢިއްޒު ވިދާޅުވިއެވެ.
މާލެ ސިޓީ ކައުންސިލުން ހުޅުމާލޭ ފޭސް 1 އަދި ފޭސް 2 ހިމެނޭ ގޮތަށް އެޗްޑީސީއަށް ހަދައިދީފައިވާ ރަޖިސްޓްރީ ބާޠިލްކުރުމަށް މާލެ ސިޓީ ކައުންސިލުން ނިންމުމާ ގުޅިގެން އެޗްޑީސީއާއި މާލެ ސިޓީ ކައުންސިލްގެ ކޯޅުން އަންނަނީ ހޫނުވަމުންނެވެ.
ކުއްލިގޮތަކަށް އެޗްޑީސީގެ މިލްކުގެ ދަށުގައިވާ ހުޅުމާލެ ބިމުގެ ރަޖިސްޓަރީ ބާޠިލުކުރުމަށް މާލެ ސިޓީ ކައުންސިލުން ނިންމެވި ނިންމުމަކީ ޤާނޫނާ ޚިލާފް ނިންމުމެއް ކަމަށާއި މިކަމުގައި ލިބޭ ގެއްލުމުގެ ބަދަލު ހޯދަން ކޯޓަށް ދާނެކަމަށް އެޗްޑީސީން ވަނީ ވިދާޅުވެފައެވެ. އަދި ހުޅުމާލޭގެ ބިމަކީ އެ ކުންފުނީގެ އަމިއްލަ ޚަރަދުގައި ހިއްކައިފައިވާ، އަމިއްލަ ބިމެއް ކަމަށާއި އެ ކުންފުންޏަކީ ޤާނޫނީ ގޮތުން މުދާ މިލްކުކުރުމުގެ ހައްގު ލިބިފައިވާ ވަކި ޝަޚުސަކަށްވީ ހިނދު، އެ ކުންފުންޏަށް ލިބިފައިވާ ހުޅުމާލޭ ބިމުގެ ރަޖިސްޓްރީ ބާޠިލްކުރަން ސިޓީ ކައުންސިލުން ނިންމީ ގާނޫނު އަސާސީއާ ވެސް ޚިލާފަށް ކަމަށް އެޗްޑީސީން ވަނީ ވިދާޅުވެފައެވެ.
މީގެ ކުރިން ވެސް އޭސީސީން ވަނީ މުއިއްޒުގެ ހައުސިން މިނިސްޓަރުކަމުގައި ސްޓްރާޑާ ޕްރައިވެޓް ލިމިޓެޑުން ހެދި ބްރިޖް ވިއު ޕްލެޓްފޯމްގެ އެގްރީމެންޓާ ގުޅޭ ބައެއް ތުހުމަތުތަކާ ގުޅިގެން ވެސް މުއިއްޒު ހާޒިރުކޮށްފައެވެ.
Ads by STO
