މިދިޔަ 5 އަހަރު ތެރޭގައި އޭސީސީން ޕީޖީއަށް ފޮނުވީ އެކެއް އިންސައްތަ މައްސަލަ
2015ވަނަ އަހަރުން 2020 ވަނަ އަހަރުގެ ނިޔަލަށް، 5 އަހަރުގެ މުއްދަތުގެ ތެރޭގައި އެންޓި ކޮރަޕްޝަން ކޮމިޝަން (އޭސީސީ)އިން ނިންމައި ޕްރޮސެކިއުޓާ ޖެނެރަލް އޮފީހަށް ދައުވާ ކުރަން ފޮނުވީ ހުށަހެޅުނު މައްސަލަތަކުގެ އެންމެ އެއް އިންސައްތަ ކަމަށް، އޭސީސީގެ ޕާފޯމެންސް އޮޑިޓް ރިޕޯޓުން ދައްކައިފިއެވެ.
އޮޑިޓަރ ޖެނެރަލްގެ އޮފީހުން އެކުލަވައިލައިފައިވާ މި ރިޕޯޓު މިއަދު އޮތް މަޖިލިސް ޖަލްސާއަށް ވަނީ ހުށަހަޅައިފައެވެ. މިރިޕޯޓާ އެކު މިނިވަން މުއައްސަސާތަކާ ބެހޭ ކޮމިޓީން ވަނީ އޭސީސީގެ ހަތަރު މެމްބަރުން ވަކިކުރަން ވެސް ހުށަހަޅައިފައެވެ. އެހެން ނަމަވެސް އެ ކޮމިޝަންގެ މެމްބަރު މުހައްމަދު ޝަކީލް މިއަދުން ފެށިގެން އިސްތިއުފާ ދެއްވާފައިވާކަން ރައީސް އޮފީހުން މަޖިލީހަށް އަންގައިފައި ވާތީ ވަކިކުރުމުގެ މަސައްކަތް މަޖިލީހުން ކުރާނީ ތިން މެމްބަރުންގެކަމަށް ރިޔާސަތުން ވަނީ އިއުލާންކޮށްފައެވެ. އެތިން މެމްބަރުންނަކީ ކޮމިޝަންގެ ރައީސް މަރިޔަމް ޝިއުނާއާއި، ނައިބު ރައީސް ފާތިމަތު އަނޫލާ އަދި މެންބަރު އާއިޝަތު ޢަބްދުﷲއެވެ.
އޮޑިޓް ރިޕޯޓުގައި ބުނާގޮތުން ހުށަހެޅިފައިވާ މައްސަލަތަކުގެ ތެރެއިން އޭސީސީގެ މަސައްކަތް މުޅިން ނިންމައި ޕީޖީއަށް ދައުވާކުރަން ފޮނުވީ އެންމެ އެކެއް އިންސައްތަ މައްސަލައެވެ. އަދި އެހެން އިދާރާތަކަށް ފޮނުވީ ފަހެއް އިންސައްތަ މައްސަލައެވެ.
އޭސީސީއަށް ހުށަހެޅުނު ގިނަ މައްސަލަތަކުގައި އެކޮމިޝަނުން ނިންމައިފައި ވަނީ ކޮރަޕްޝަން ނުހިމެނޭ ކަމަށެވެ. އެގޮތުން ހުށަހެޅުނު މައްސަލަތަކުގެ 61 އިންސައްތަ މައްސަލައިގައި ކޮރަޕްޝަން ނުހިމެނޭކަމަށް ވަނީ ނިންމައިފައެވެ. މީގެ އިތުރުން ނުބަލައި ދޫކޮށްލަން ނިންމި މައްސަލަތަކުގެ އިންސައްތަ އުޅެނީ 10 ގައެވެ.
މިނިވަން މުއައްސަސާތަކާ ބެހޭ ކޮމިޓީން މި އޮޑިޓް ރިޕޯޓަށް ރިއާޔަތްކޮށް އޭސީސީގައި ހުރި މައްސަލަތައް ވެސް ވަނީ ފާހަގަކޮށްފައެވެ. އެގޮތުން ފާހަގަކުރެވުނު މައްސަލަތަކަކީ؛
- އޭސީސީއަށް ހުށަހެޅި މައްސަލަތަކުގެ ތެރެއިން ދައުވާކުރަން އެދި ޕްރޮސެކިއުޓާ ޖެނެރަލްގެ އޮފީހަށް ހުށަހަޅައިފައި ވަނީ އެންމެ އެއް ޕަސެންޓް މައްސަލަކަމަށް ވުން، އެއީ އިންވެސްޓިގޭޓަރުންގެ ގާބިލުކަމުގެ މައްސަލަ ހުރި ކަމަށް އޮޑިޓުން އެނގިފައިވުން
- ހުށަހަޅާ މައްސަލަތަކުގެ ކޭސް މެނޭޖްމަންޓް އަޕްޑޭޓްނުވުމުގެ ސަބަބުން ކޭސްތަކުގެ ތަފާސްހިސާބު ފުރިހަމަ ނޫންކަން.
- ގިނަ އަހަރުތަކެއްވީ އިރު ވެސް ނުނިމޭ މައްސަލަތައް ހުރުން
- ތަހުގީގު ނިމުމަށް ފަހު ވެސް ދައުވާކުރަން ނުފޮނުވި ގިނަ ދުވަސްވުން.
- ރިސްކް އެސެސްމެންޓް ރިޕޯޓް ހަދައި، އަށް މުއައްސަސާއަކަށް ހުށަހެޅުމުން، އެ ތަންތަނުން އެކްޝަން ޕްލޭން ހުށަނޭޅުމުން ވެސް ކޮމިޝަނުން ފިޔަވަޅު ނޭޅުން.
- މަސައްކަތް އަވަސްކުރަން ކޮމިޓީން އޭސީސީއަށް ތަކުރާރުކޮށް އެންގުމުން ވެސް އަވަސްނުކުރުން.
- އެމްއެމްޕީއާރްސީގެ މައްސަލަތައް އަވަސްކުރަން ކޮމިޝަނަށް ބޭނުންވާ އިންތިޒާމްތައް ހަމަޖައްސައިދޭން މަސައްކަތް ކުރުމުން ވެސް ދައުވާކުރަން ފޮނުވާނެ ކަމަށް ބުނި އަދަދުގެ މައްސަލަތައް ނުފޮނުވުން.
- ކޮރަޕްޝަނުގެ ތެރެއިން ގެއްލުނު ފައިސާގެ ތެރެއިން ހޯދުނީ އެންމެ 11،000ރ. ކަމަށް ވުން
- ޕީޖީއަށް ފޮނުވި މައްސަލަތަކުގެ ތެރެއިން ދައުވާ ނުކޮށް އަނބުރައި ފޮނުވައިލި މައްސަލަތަކުގެ އަދަދު ގިނަވުން.
- ކޮމިޝަނުގެ މެމްބަރުން ބަދަލުކޮށްގެން ނޫނީ މަސައްކަތް ރަނގަޅުކުރެވޭނެ ކަމަށް ކޮމިޓީއަށް ގަބޫލުނުކުރެވުން
ދައުރުން ބޭރުން މިއަދު މަޖިލިސް ޖަލްސާއެއް ބޭއްވީ އޭސީސީން މެމްބަރުން ވަކިކުރުމަށް މިނިވަން މުއައްސަސާތަކާ ބެހޭ ކޮމިޓީން އެދިފައިވާތީ އެކަން މަޖިލީހުގައި އިއުލާން ކުރުމަށެވެ. އެއަށް ފަހު މަޖިލީހުން ވަނީ އެމައްސަލައިގައި ކޮމިޓީން ތައްޔާރުކުރި ރިޕޯޓު ދިރާސާ ކުރުމަށް މިނިވަން މުއައްސަސާތަކާ ބެހޭ ކޮމިޓީއަށް ފޮނުވައިފައެވެ.
ކޮމިޓީން ރިޕޯޓު ދިރާސާ ކުރަން 3 ދުވަހުގެ މުއްދަތެއް ދޭން ޖެހެއެވެ. އެއަށްފަހު ދެން އޮންނާނީ މަޖިލިސް ތަޅުމުގައި ކޮމިޓީން ނިންމާ ގޮތަށް ބަހުސް ކުރުމެވެ. ބަހުސް ކުރަން 2 ގަޑިއިރުގެ ވަގުތެއް ދިނުމަށް ފަހު މެމްބަރުން ވަކިކުރަން ވޯޓަށް އަހާނެއެވެ.
މަޖިލީހުގެ ރިޔާސަތުން މިއަދު ބުނީ ދެން ޖަލްސާއެއް އޮންނަ ތާރީހެއް އިއުލާން ކުރާނެ ކަމަށެވެ.
