ރާއްޖެއަށް ރިޒްގު ލިބެނީ އިންޑިއާ ކަނޑުން، އެންމެ މުހިންމީ މިކަނޑުގެ ރައްކާތެރިކަން: ނަޝީދު

ދިވެހިރާއްޖެއަށް ލިބޭ ރިޒުގެއް މި ލިބެނީ އިންޑިއާ ކަނޑުން ކަމަށާއި އެހެންކަމުން ގައުމަށް އެންމެ މުހިންމީ އިންޑިއާ ކަނޑުގެ ސަލާމަތާއި ރައްކާތެރިކަން ކަމުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

Ads by STELCO

ބަނގްލަދޭޝްގެ ބޮޑުވަޒީރު ޝެއިހް ހަސީނާ ރާއްޖެއަށް ވަޑައިގަންނަވާ ރަސްމީ ދަތުރުފުޅުގައި ރައްޔިތުންގެ މަޖިލީހުގައި ތަގުރީރު ކުރެއްވުމަށް ދައުވަތު ދިނުމުގެ ގޮތުން މަޖިލިސް މެމްބަރުންގެ ރުހުން ހޯދަން މަޖިލީހުގައި ހޯމަ ދުވަހު ބޭއްވި ޖަލްސާގައި ރިޔާސަތުގައި އިންނަވައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ އިންޑިއާ ކަނޑުގައި އުފެދެމުން މިއަންނަ ވާދަވެރިކަމުގައި ރާއްޖެއަށް މިވަނީ ހައްސާސް އަދި އެހައިމެ ނާޒުކު ހަތަރު އަނގޮޅިއަކަށް ހުއްޓެން ޖެހިފައި ކަމަށެވެ. މިހުއްޓުމުގައި ދިވެހިން ބޭނުން ވަނީ އިތުރު ރަހުމަތްތެރިންނާއި ގުޅުން ބަދަހި ކުރަންކަމަށާއި އެއްވެސް ގައުމެއްގެ ދައުރު އަދި ވަކިން ހާއްސަކޮށް އަވައްޓެރި ގައުމުތަކުގެ ތެރެއިން އެތެރެވަރި ގައުމުތަކުގެ ދައުރެއް ރާއްޖޭގައި ނެތްކަމަށް ބުނުމަކީ ހަގީގަތާ ހިލާފު ވާހަކައެއް ނޫންކަމަށް ރައީސް ނަޝީދު ވިދާޅުވިއެވެ.

"(މިއީ) އެހާމެ ދިވެހިންނަށް ނިކަމެތިކަން ލިބޭނެ ދެރަ ގޮތްތައް މެދުވެރިކުރާނޭ ބުނުމެއް، ފިކުރެއް، ފަލްސަފާއެއް. ދިވެހިންގެ ދައުރު އިންޑިއާ ކަނޑުގައި ވަރަށް ބޮޑު. ދިހަ ހާހަށް ވުރެ ގިނަ އުޅަނދުގައި ފަންސާސް ހާހަށް ވުރެ ގިނަ ދިވެހިން އަބަދުވެސް މިއިންޑިއާ ކަނޑުގައި ދަތުރު ކުރާނެ" އިންޑިއާ ސިފައިން ބޭރުކުރުމާ ގުޅޭ ގޮތުން އިދިކޮޅުން ކުރިއަށް ގެންދާ ކެމްޕެއިނަށް ނުސީދާކޮށް ރައްދު ދެއްވަމުން ނަޝީދު ވިދާޅުވިއެވެ.

މީގެ އިތުރުން އެމަނިކުފާނު ވިދާޅުވީ ދިވެހިންގެ އެންމެ ބޮޑު މަސްލަހަތަކީ އިންޑިއާ ކަނޑުގެ ސަލާމަތާއި ރައްކާތެރިކަން ކަމަށެވެ. އެއީ މިރާއްޖެއަށް ލިބޭ ރިޒުގެއް މި ލިބެނީ މިކަނޑުންކަމަށް ނަޝީދު ވިދާޅުވިއެވެ.

މީގެ އިތުރުން ބަނގްލަދޭޝްއާ ގުޅޭގޮތުން ވެސް ރައީސް ނަޝީދު ވާހަކަފުޅު ދެއްކެވިއެވެ. އެގޮތުން ވިދާޅުވީ ބަނގްލަދޭޝްއަކީ މި ސަރަހައްދުގެ ގައުމުތަކުގެ ތެރެއިން އެންމެ ހަލުވި ދުވެލީގައި މިހާރު ކުރިއަރަމުން އަންނަ ގައުމުކަމަށެވެ. 250 މިލިއަނަށް ވުރެ ގިނަ މީހުންގެ އާބާދީ އޮންނަ އެގައުމުގައި ކޮވިޑް-19 ގ ބަލިމަޑުކަމުގެ ތެރޭގައި 2020 ވަނަ އަހަރު ގައުމީ އުފެއްދުންތެރިކަން ހުރީ 310 ބިލިއަން ޔޫއެސް ޑޮލަރުގައި ކަމަށާއި ރާއްޖޭގައި މިއަދަދު 2019 ވަނަ އަހަރު ހުރީ 5 ބިލިއަން ޔޫއެސް ޑޮލަރުގައި ކަމަށް ނަޝީދު ވިދާޅުވިއެވެ.

"ބަނގްލަދޭޝްއަކީ އެތެރެވަރީގައި އެންމެ ބާރު ސްޕީޑުގައި ތަރައްގީވާ އެއް ގައުމު. ބަނގްލަދޭޝް ހާއްސަކޮށް ފާހަގަވަނީ ބަނގްލަދޭޝްގެ ބޭރުގެ ދަރަނި މިސަރަހައްދުގައި އެންމެ ކުޑަ ގައުމު. ބަނގްލަދޭޝްގެ ޖީޑީޕީގެ 45 ޕަސެންޓުގެ ނިސްބަތް އެއީ އެމީހުންގެ، އެގައުމުގެ ބޭރުގެ ދަރަނި" ރައީސް ނަޝީދު ވިދާޅުވިއެވެ.

ޗައިނާ މެދުވެރިކޮށް ރާއްޖެއިން ނަގައިފައިވާ ލޯނުތައް ބޮޑުކަން އަބަދުވެސް ފާހަގަކުރައްވާ ރައީސް ނަޝީދު މަޖިލީހުގައި ވިދާޅުވީ ބަނގްލަދޭޝްގައި ބޭރުގެ އެއްގައުމަކަށް ދަރައިފައި އޮތް ބޮޑު އެއްވެސް ދަރަންޏެއް ނެތްކަމަށެވެ.

ރައީސް އިބްރާހިމް މުހައްމަދު ޞާލިހުގެ ރަސްމީ ދައުވަތަކަށް ޝެއިހް ހަސީނާ ރާއްޖެ ވަޑައިގަންނަވާނީ މިމަހުގެ 23 ވަނަ ދުވަހުއެވެ. އެކަމަނާ މަޖިލީހުގައި ތަގުރީރު ކުރައްވާނީ އެދުވަހުގެ ހަވީރު 4:00 ގައެވެ.