ރައީސް ޔާމީންގެ ޝަރީއަތް: ލިޔުންތައް ލިބުން ލަސްވުމުން، އިތުރު ދެ އަޑުއެހުމެއް މި މަހު ބާއްވަނީ
ވ.އާރަށް ކުއްޔަށް ދޫކުރުމުގައި ކޮށްފައިވާ މުއާމަލާތަކާ ގުޅިގެން ކުރީގެ ރައީސް، ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ކުރާ ދައުވާތަކުގެ އިބްތިދާއީ އަޑުއެހުންތައް މިއަދު ފަށައިފިއެވެ.
ދައުލަތުގެ ފަރާތުން މި މައްސަލައިގައި ރައީސް ޔާމީންގެ މައްޗަށް އުފުލައިފައިވަނީ މަނީ ލޯންޑްރިންގެ ކުށުގެ ދައުވާއާއި ރިޝްވަތު ގަބޫލުކުރުމުގެ ކުށުގެ ދައުވާއެވެ.
މި މައްސަލައިގެ އިބްތިދާއީ އަޑުއެހުންތައް ކްރިމިނަލް ކޯޓުގައި ފަށައިފައިވާއިރު، މިއަދު ކުރިއަށް ދިޔައީ ހައްގުތައް ކަށަވަރުކުރުމުގެ ބައެވެ. ނަމަވެސް ބައެއް ލިޔެކިޔުންތައް މިއަދުގެ ވަގުތެއްގައި ލިބިވަޑައިގަތުމާ ގުޅިގެން ރައީސް ޔާމީންގެ ގާނޫނީ ވަކީލު ޑރ. މުހައްމަދު ޖަމީލް އަހުމަދު ކޯޓުގައި ވިދާޅުވީ ލިޔުންތައް ބަލައި ދިރާސާކުރަން އެކަށީގެންވާ ވަގުތު ރައީސް ޔާމީންގެ ވަކީލުންގެ ޓީމަށް ލިބިވަޑައިނުގަންނަވާ ކަމަށެވެ.
އެހެންކަމުން އިސް ގާޒީ އަހުމަދު ޝަކީލް ވިދާޅުވީ ހައްގުތައް ކަށަވަރުކުރުމަށާއި އަދި ދައުވާ ސާފުކޮށްދިނުމަށް މިމަހުގެ މިމަހުގެ 13 އަދި 27 ވަނަ ދުވަހުގެ ހެނދުނު 9:30ގައި ބާއްވާނެ ކަމަށެވެ.
އާރަށުގެ މައްސަލަ ކުރިއަށް ގެންދަނީ މި މައްސަލައިގައި ދެން ހިމެނޭ ވ. ފެލިދޫ/ ހަނދުވަރީގެ، ޔޫސުފް ނައީމާ ވެސް އެކުގައެވެ. އޭނާއަށް ވަކީލަކު ހަމަޖެއްސުމަށް 10 ދުވަހުގެ ފުރުސަތެއް ވެސް އިސް ގާޒީ މިއަދުގެ އަޑުއެހުމުގައި ދެއްވެވިއެވެ.