ފެނަކައިގެ އިންޖީނުގެތައް ކުރިޔަށް އޮތް 20 އަހަރު ބަދަލު ނުގެނެސް ޚިދުމަތް ދެވޭނެ: ރައީސް ޞާލިޙް
ރަށްރަށުގައި ފެނަކައިން ތަރައްޤީ ކުރަމުން އަންނަ އާ އިންޖީނުގެތައް ކުރިއަށް އޮތް 20 އަހަރު ވެސް ބަދަލެއް ނުގެނެސް ހިދުމަތް ދެވޭނެ ރައީސް އިބްރާހީމް މުހައްމަދު ޞާލިޙް ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ، ނ.އަތޮޅުގެ ބައެއް ރަށްރަށަށް ކުރައްވަމުން ގެންދަވާ ޒިޔާރަތުގައި ނ. މަނަދުއަށް މިއަދު ވަޑައިގެން އެ ރަށުގެ އައު އިންޖީނުގެ ހުޅުއްވައި ދެއްވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ޞާލިޙް މިއަދު ދެއްކެވި ވާހަކަފުޅުގައި ފެނަކައަށް ވަރަށް ބޮޑަށް ތައުރީފް ކުރައްވައިފައެވެ. މިގޮތުން ވިދާޅުވީ، ފެނަކައިން އަލަށް އިމާރާތް ކުރާ އިންޖީނު ގެތައް އިމާރާތް ކުރަނީ މުވައްޒިފުންނަށް ރަނގަޅު މާހައުލެއް ލިބިދެނިވި ގޮތަށް ކަމަށާއި އަދި އެ އިމާރާތްތަކަކީ ކުރިޔަށް އޮތް 15 ނުވަތަ 20 އަހަރުގެ ތެރޭގައި ވެސް އިތުރު ބަދަލެއް ނުގެނެސް ޚިދުމަތް ދެވޭނެ ފަދަ ގޮތަަކަށް އިމާރާތްކޮށްފައިވާ އިމާރާތްތަކެއް ކަމަށެވެ.
"އައު އިންޖީނުގެތަކަކީ ދުރުވިސްނައިގެން ޕްލޭންތަކެއް" ރައީސް ޞާލިޙް ވިދާޅުވިއެވެ.
ރައީސްގެ ވާހަކަފުޅުގައި އިތުރަށް ވިދާޅުވީ، މީހުން ދިރިއުޅޭ ސަރަހައްދާ ދުރަށް އިންޖީނުގެތައް ބަދަލު ކުރުމަކީ މި ސަރުކާރުގެ ވައުދެއް ކަމަށާއި އެ ވައުދު މި ސަރުކާރުން ފެނަކައާ އެކު ފުއްދައިފި ކަމަށެވެ.
މިއަދު ބޭއްވި ރަސްމިއްޔާތުގައި ފެނަކައިގެ މެނޭޖިން ޑިރެކްޓަރު އަހްމަދު ސައީދު ވެސް ވަނީ ވާހަކަފުޅު ދައްކަވައިފައެވެ. މިގޮތުން ވިދާޅުވީ، ކެޕޭސިޓީގެ އެއްވެސް މައްސަލައެއް ދިމާވެގެން ފެނަކައިން ޚިދުމަތްދޭ އެއްވެސް ރަށަކުން މިހާރު ކަރަންޓު ނުކެނޑޭނެ ކަމަށެވެ. އަދި ކަރަންޓުގެ ހިދުމަތް ފޯރުކޮށްދިނުމުގައި ބޮޑެތި ގޮންޖެހުންތަކާއި ހިތްދަތި އެތައް ކަމެއް ތަޖުރިބާކުރަން ޖެހުނު ކަމަށް ވިދާޅުވަމުން ސައީދު ވިދާޅުވީ، މިއަދު އެކަން ފެނަކައިން ހައްލުކޮށްދީފައިވާ ކަމަށެވެ.
Ads by STO
