އިންޑިއާ އައުޓް އެއްވުމުގެ ތެރެއިން ހަ މީހަކު ހައްޔަރުކޮށްފި
އިދިކޮޅު ޕީޕީއެމްއިން އިސްވެ ކުރިޔަށް ގެންދާ "އިންޑިއާ އައުޓް" އެއްވުމުގެ ތެރެއިން ހަ މީހަކު ހައްޔަރުކޮށްފިއެވެ.
މައުލޫމާތު ލިބިފައިވާ ގޮތުގައި މިއަދު ކުރިޔަށްދިޔަ ހަރަކާތުގެ ތެރެއިން ހައްޔަރު ކުރި މީހުންގެ ތެރޭގައި ދެ އަންހެނުން ހިމެނެއެވެ. މީގެ އިތުރުން ހައްޔަރުކުރި މީހުންގެ ތެރޭގައި ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް ވެސް ހިމެނެއެވެ.
މި ހަރަކާތް ފަށައިފައި ވަނީ މިއަދު ހަވީރު ޕީޕީއެމް އޮފީސް ކުރިމަތިންނެވެ. އިދިކޮޅުގެ ފަރާތުން މިއަދު ބޭއްވި މުޒާހަރާގެ ތެރެއިން މީހުން ހައްޔަރު ކޮށްގެން ގެންދާ މަންޒަރު ދައްކުވައިދޭ ފޮޓޯތަކެއް ވެސް މިހާރު މީސްމީޑިއާގައި ދަނީ ދައުރުވަމުންނެވެ.
އިންޑިއާ ސިފައިން ރާއްޖެއިން ބޭލުމަށް ގޮވައިލައި "އިންޑިއާ އައުޓް"ގެ ނަމުގައި ކުރިއަށްގެންދާ ކެމްޕޭނު، މާލެ ސަރަހައްދުގެ އިތުރުން ރަށްރަށުގައި ވެސް ދަނީ ކުރިއަށްގެންދަމުންނެވެ. އެގޮތުން ބައެއް ރަށްރަށުގައި މި ކެމްޕޭނު ކުރިއަށް ގެންދިޔުމުގައި އިދިކޮޅު ލީޑަރު އަދި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ވެސް ބައިވެރިވެވަޑައިގެންފައިވެއެވެ.
އިންޑިއާއާ ދެކޮޅަށް އިދިކޮޅުން ހިންގާ މި ހަރަކާތްތަކާ ދެކޮޅަށް ސަރުކާރާއި ރައްޔިތުންގެ މަޖިލީހުގެ ބައެއް މެންބަރުން ވެސް ގެންދަވަނީ ވާހަކަ ދައްކަވަމުންނެވެ.
