ގުއި ފެނުން ފެންވައިގެން އުޅުމަކީ ކިހާވަރުގެ ކަމެއްކަން މާލެ އެކަނި ތަރައްޤީ ކުރަން ވިސްނާ ބަޔަކަށް ނޭނގޭނެ: ޝައުނާ
މޯލްޑިވްސް ޑިމޮކްރަޓިކް ޕާޓީ (އެމްޑީޕީ)އިން ވައުދުވީ، އަނިޔާވެރިކަމުން މިންޖުވެތިބެ ތާހިރު ދިރިއުޅެއް ރައްޔިތުންނަށް ފޯރުކޮށްދިނުމަށް ކަމަށާއި އެ ވައުދު މިއަދު އެ ޕާޓީން ހާސިލްކޮށްފި ކަމަށް މިނިސްޓަރ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީ އައިމިނަތު ޝައުނާ ވިދާޅުވެއްޖެއެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގައި އެމްޑީޕީގެ ފަރާތުން ވާދަކުރައްވާ ކެންޑިޑޭޓް މުހައްމަދު ރާޝިދުގެ ކެމްޕެއިން އިފުތިތާހު ކުރުމަށް މިރޭ ބޭއްވި ޖަލްސާގައި ވާހަކަފުޅު ދައްވަމުން ޝައުނާ ވިދާޅުވީ، އެމްޑީޕީން އަބަދުވެސް އޮންނާނީ ހުރިހާ ރައްޔިތުންނާ އެކު މަސައްކަތް ކުރުމަށް ތައްޔާރަށް ކަމަށެވެ. އަދި އެމްޑީޕީގެ ވެރިކަންތަކުގައި ރާއްޖޭގެ ރަށްތަކަށް ބޮޑެތި ތަރައްޤީ އައި ކަމަށް ވިދާޅުވަމުން ޝައުނާ ވިދާޅުވީ އެމްޑީޕީގެ ވެރިކަމުގައި ރާއްޖޭގައި އިންޤިލާބީ ބަދަލެއް ނާންނަ އެންމެ ރަށެއް ނެތް ކަމަށެވެ.
މީގެ އިތުރުން އެމްޑީޕީގެ ބައެއް ސިޔާސަތުތަކަކީ މުޅި ރާއްޖެއަށް މުހިންމު ސިޔާސަތުތަކެއް ކަމަށް ޝައުނާ ފާހަގަ ކުރެއްވިއެވެ. މިގޮތުން ރައީސް ނަޝީދުގެ ވެރިކަމުގައި ތައާރަފް ކުރެވުނު ޖީއެސްޓީ ފަދަ ޓެކްސްގެ ނިޒާމުގެ ވާހަކަ ޝައުނާ ފާހަގަ ކުރެއްވިއެވެ. ޝައުނާ ވިދާޅުވީ، ކޮވިޑާއެކު ރާއްޖެ ބަންދުވެފައި އޮތްއިރު ވެސް ރާއްޖޭގައި މަޝްރޫއުތައް ކުރިޔަށް ގެންދުނީ ރާއްޖޭގެ ދައުލަތް ފުދުންތެރިވުމުން ކަމަށެވެ. އަދި ފުދުންތެރި ދައުލަތަށް ރާއްޖެ ވެގެން ދިޔައީ، ޓެކްސް ނެގުން ފަދަ އެމްޑީޕީގެ މާލީ ސިޔާސަތުތަކުން ކަމަށް ޝައުނާ ވިދާޅުވިއެވެ.
2008ވަނަ އަހަރު ވެރިކަމާ އެމްޑީޕީން ހަވާލުވިއިރުގައި، ދައުލަތުގެ އާއްމުދަނީއަކީ 7 ބިލިޔަން ރުފިޔާ. މި ޕާޓީގެ އެންމެ ފުރަތަމަ މަސައްކަތަކަށްވީ، އަޅުގަނޑުމެންގެ ސިޔާސަތަކީ މުޅިން އަލަށް ރާއްޖެއަށް ޓެކްސްގެ ސިޔާސަތުތައް ތައާރަފް ކުރުން. އެއާ އެކު ބައްލަވާ، މިއަދު ދައުލަތުގެ އާއްމުދަނީ އެދަނީ 28 ބިލިޔަން، 30 ބިިޔަނަށް އަރަމުން. މިއީ އަޅުގަނޑު މި ދަންނަވާ އިންޤިލާބީ ބަދަލަކީ.
ރާއްޖޭގެ ހުރިހާ ރަށެއްގައި ފެނާއި ނަރުދަމާ ޤާއިމް ކުރަން މި ސަރުކާރުން ނިންމެވި ނިންމެވުމަށް އަލި އަޅުއްވައިލަމުން، ޝައުނާ ވިދާޅުވީ، ތަރައްޤީ ގެނެވޭނީ ގައިން ތާހިރު ވެގެން ކަމަށާއި މިއަދު ގައިން ތާހިރު ވެވޭނެ ގޮތް ސަރުކާރުން ހުރިހާ ދިވެހިންނަށް ފޯރުކޮށްދީފި ކަމަށެވެ.
"މާލެއަކީ ހަމައެކަނި ތަރައްޤީ ކުރަން އޮތް ތަނޭ، ނުވަތަ ރާއްޖޭގެ ހުރިހާ ރައްޔިތުން ތިބެންވީ މާލޭގައި ކަމަށް ހީފުޅުވާ ބޭފުޅުންނަށް، އެނގިވަޑައިނުގަންނަވާފާނެ، މި ރަށްރަށުގެ ރައްޔިތުން ދިމާވާ ތަކުލީފް. ގުއި ފެނުން ފެންވަރައިގެން އުޅުމަކީ ކިހާވަރެއްގެ ތަކުލީފެއް ކަމެއް އެބޭފުޅުންނަށް އެނގިވަޑައިނުގެންފާނެ." ޝައުނާ ވިދާޅުވިއެވެ.
ބަލަ ޝިއުނާ. ކަލޭ ތިޔަ ވާހަކަދައްކަންހުރި ކޮމަންޑުއަކީ މީގެ 22ގެ އަހަރުކުރިން ނަރުމާއަޅާ ކޮމަންޑޫ ރައްޔިތުން އަމިއްލައަށް މީރުފެން ޕްލާންޓް ބަހައްޓައިގެން ޚިދްމަތް ހޯދަމުންދާ ބައެއް. އެމްޑީޕީ ނަރުދަމާ ކިޔަން އެނގިގެން ތިއުޅެނީ އަދިކިރިޔާ. ކުރިންވެސް 3އަހަރާ ބައި ވަންދެން ހޭވި. ނުވި އެއްކަމެއްވެސް. މިހާރު 5 އަނެއްކާ ހަމަވަނީ. ގައިމުވެސް އަދި ކޮމަންޑުއަކަށް ކޮށްދިންކަމެއް ނޯންނާނެ. އަނގައޮތިއްޔާ ކާޅެއްނުކާނެ ވިއްޔަ.