ފިލްމު "83"އަށް އާންމުންގެ ތަރުހީބު ނުލިބުމުން ބަޔޮޕިކް ފިލްމު ނުކުޅެން ރަންވީރު ނިންމައިފި
ކަބީރް ޚާން ޑައިރެކްޓްކުރި ފިލްމު 83 ބޮކްސް އޮފީހުގައި ދެއްކި ދަށް ޕާފޯމަންސްގެ ސަބަބުން އޭގައި އިސް ރޯލު ކުޅުނު ރަންވީރު ސިންގ ދެން ބަޔޮގްރެފިކަލް ޑްރާމާތައް ނުކުޅެން ނިންމައިފިއެވެ.
"ބާޖީރާއޯ މަސްތާނީ"އާއި "ޕަދްމާވަތު" ފަދަ ބައޮޕިކްތަކުގައި ރަނގަޅު ޕާފޯމެންސެއް ދިނުމަށް ފަހު ރަންވީރު ސިންގް އެންމެ ފަހުން ރިލީޒްކުރި 83ގައި ކަޕިލް ދޭވްގެ ރޯލު ކުޅުނު ނަމަވެސް ބޮކްސް އޮފީހުގައި ފިލްމު ވަނީ ވަރަށް ބޮޑަށް ފެއިލްވެފައެވެ. ރަންވީރުގެ މި ރޯލަށް ހީކުރިހައި ބޮޑު ތަރުހީބެއް ނުލިބުނެވެ.
ބޮކްސް އޮފީހުގައި ފިލްމު 83ގެ ދަށް ޕާފޯމަންސްގެ ސަބަބުން ރަންވީރު ސިންގއަށް ވަނީ މި ނިންމުން ނިންމުމަށް މަޖުބޫރުވެފައެވެ. ރިޕޯޓްތަކުން ބުނާ ގޮތުގައި ރަންވީރު ސިންގ މިހާރު ވަނީ އެއްވެސް ބައޮޕިކް ފިލްމެއްގެ ބަތަލަކަށް ވުން ހުއްޓައިލައިފައެވެ. މީގެ ދުވަސްކޮޅެއް ކުރިން ރަންވީރު ވަނީ އޭނާގެ ފިލްމު އުފެއްދުންތެރިޔާ މެގްނާ ގުލްޒާރު ސޭމް މަނެކްޝާވާގެ ބައޮޕިކްއަކަށް ވެސް ނޫނެކޭ ބުނެފައެވެ.
ރަންވީރު ސިންގގެ ފިލްމުތަކުގެ ތެރެއިން ދެން އެންމެ އަވަހަށް ރިލީޒްވާނީ 'ރޮކީ އެންޑް ރާނީގެ ލަވް ސްޓޯރީ'އެވެ. މި ފިލްމުގައި އޭނާ ފެނިގެންދާނީ އާލިއާ ބަޓްއާ އެކުއެވެ. މީގެ ކުރިން ރަންވީރު ސިންގއާއި އާލިއާ ބަޓް އެކުގައި ފެނިގެން ގޮސްފައި ވަނީ ފިލްމު "ގަލީ ބޯއި"އިންނެވެ. ދެން އޭނާ ފެނިގެންދާނީ ޖެކޮލިން ފެނާންޑޭޒްއާއި ޕޫޖާ ހެގްޑޭއާ އެކު ރޯހިތު ޝެޓީގެ ފިލްމު "ސަރކަސް" އިންނެވެ.
