ކޮވިޑް-19ގެ ހާލަތާ ގުޅޭ ގޮތުން ވަޒީރުންގެ މަޖިލީހުގައި މަޝްވަރާކުރައްވައިފި
ރާއްޖޭގައި މި ދުވަސްވަރު ކޮވިޑް-19 ޖެހޭ މީހުންގެ ޢަދަދު އިތުރުވަމުންދާތީ ކޮވިޑް-19ގެ ޙާލަތާ ގުޅޭގޮތުން ވަޒީރުންގެ މަޖިލީހުގައި މިއަދު މަޝްވަރާ ކުރައްވައިފިއެވެ.
މިއަދު ބޭއްވެވި ވަޒީރުންގެ މަޖިލީހުގެ ބައްދަލުވުމުގައި ކޮވިޑް-19ގެ ޙާލަތާ ގުޅޭގޮތުން މަޝްވަރާ ކުރައްވަމުން ވަޒީރުންގެ މަޖިލީހުގެ މެންބަރުން ވަނީ ކޮވިޑް-19 ބަލި ހުރިކަން ދެނެގަތުމަށް ހަދަން ޖެހޭ ޓެސްޓް، އާންމުންނަށް ފަސޭހަކަމާ އެކު ހެދޭނެ ގޮތްތައް ހަމަޖެއްސެވުމަށް ކުރެވެން ހުރި ކަންކަމާ ގުޅޭގޮތުން މަޝްވަރާ ކުރައްވައިފައެވެ.
މީގެ އިތުރުން ކޮވިޑް-19 ވެކްސިންގެ ބޫސްޓަރ ޑޯޒް ޖެހުމުގެ ކަންކަން ފުޅާކުރައްވާ އިރު، ކުރު މުއްދަތެއްގެ ތެރޭގައި ވީހައި ވެސް ގިނަ ފަރާތްތަކަށް ވެކްސިން ޖެހޭނެ އިންތިޒާމުތައް، އާންމުންނަށް އެންމެ ލުއިފަސޭހަވާނެ ގޮތަކަށް ހަމަޖެއްސެވުމާ ގުޅޭ ގޮތުން ވެސް މިއަދުގެ ވަޒީރުންގެ މަޖިލީހުގައި މެންބަރުން މަޝްވަރާ ކުރެއްވިއެވެ.
